„ლელოს” ოფისში ოპოზიციური პარტიების წარმომადგენლებს შორის შეხვედრა დასრულდა. როგორც შეხვედრის შემდეგ ოპოზიციური ძალების წარმომადგენლებმა განაცხადეს, შეხვედრაზე ხვალ, რუსთაველის გამზირზე დაგეგმილი აქციის საორგანიზაციო საკითხებზე უსაუბრეს.

„ნაციონალური მოძრაობის” ერთ-ერთი ლიდერის, ზაალ უდუმაშვილის განცხადებით, შეხვედრაზე ასევე განიხილეს გუშინ, აშშ-ის ელჩის რეზიდენციაში გამართული დიალოგიც.

„დღეს ჩვენ განვიხილეთ ძირითადად საორგანიზაციო საკითხები ხვალინდელ აქციასთან დაკავშირებით. ყველა ოპოზიციური პარტიას აქ თავისი როლი გააჩნია, ამ აქციას სჭირდება ლოჯისტიკა, დაორგანიზება და ეს საკითხები განვიხილეთ დეტალურად.

საუბარი იყო გუშინდელ შეხვედრაზეც. დიალოგი რომ დაიწყო ეს არის მნიშვნელოვანი, ახლა მთავარი არის, რა კომპრომისზეა ხელისუფლება წამსვლელი. გუშინ მხარეეებმა დააფიქსირეს რადიკალურად განსხვავებული პოზიციები და სხვა თემებზე მსჯელობა არ ყოფილა, გადაწყდა, რომ გაიმართება მეორე რაუნდიც. ველოდებით ხელისუფლებისგან წინადადებებს, რას უპასუხებს მოთხოვნებს, რომელიც ოპოზიციას ჰქონდა”,- განაცხადა უდუმაშვილმა.