ცენტრალურ ამერიკასა და კოლუმბიაში ქარიშხალ „იოტას“ მსხვერპლი 40-მდე გაიზარდა, - ამის შესახებ ინფორმაციას Reuters-ი ავრცელებს.

სააგენტოს ცნობით, მოსალოდნელია, რომ დაღუპულთა რაოდენობა კიდევ უფრო გაიზრდება, ვინაიდან მაშველები სტიქიის შედეგად დაკარგულთა ძებნას განაგრძობენ.

ქარიშხალმა განსაკუთრებით ნიკარაგუა და ჰონდურასი დააზარალა და დაღუპულთა უმეტესი ნაწილიც სწორედ ამ ქვეყნებზე მოდის.

ჰონდურასის პრეზიდენტი ხუან ჰერმანდეზი საერთაშორისო საზოგადოებას დახმარებისთვის მიმართავს.

„დიდი უბედურება დაგვატყდა თავს და ქვეყნის აღდგენისთვის მსოფლიოს დახმარება გვჭირდება”, - განაცხადა პრეზიდენტმა საგანგებო პრესკონფერენციაზე.

შეგახსენებთ, ცენტრალური ამერიკის ქვეყნებს 2 კვირის წინ კიდევ ერთი ქარიშხალი, „ეტა“ დაატყდა თავს, რომელსაც სულ მცირე, 200 ადამიანი ემსხვერპლა.