ფეხბურთელ გიორგი შაქარაშვილის მკვლელობაში ბრალდებული 5 პირის სასამართლო პროცესზე პროკურატურა 4 მოწმის დაკითხვას გეგმავს, თუმცა ადვოკატები სასამართლოსთვის პროცესის გადადების შუამდგომლობით მიმართვას აპირებენ.
როგორც უფლებადამცველები აცხადებენ, შაქარაშვილის საქმეზე სხვა ეპიზოდზე დაკავებული ერთ-ერთი ბრალდებულის ადვოკატს კორონავირუსი დაუდგინდა, რომელთანაც დღევანდელ პროცესში მონაწილე ადვოკატების ნაწილს შემხებლობა ჰქონდათ. ისინი თვითიზოლაციაში იმყოფებიან და სასამართლოს სხდომის გადადების შუამდგომლობით მიმართავენ.
საქმის პროკურორის, დავით ყაზარაშვილის განცხადებით, ბრალდების მხარე სხდომის გადადებას არ დაეთანხმება, ვინაიდან პროცესზე დისტანციურად ჩართვაც შესაძლებელია. პროკურორის თქმითვე, მოწმეები სასამართლოდან დაიკითხებიან, ადვოკატები კი დისტანციურად უნდა ჩაერთონ.
ყაზარაშვილის განმარტებით, თუ ადვოკატები სხდომაში დისტანციურად მონაწილეობაზე უარს განაცხადებენ, ეს პროცესის გაჭიანურებისკენ იქნება მიმართული.
ცნობისთვის, ფეხბურთელ გიორგი შაქარაშვილის განზრახ ჯგუფურად მკვლელობას არჩილ გაგნიძეს, ნიკოლოზ რევაზიშვილს, ვახტანგ ჩიქოვანს, ზ.ხ-ს და ა.ქ.-ს ედავებიან.