ქართული პრესის მიმოხილვა 03.12.2020

კოვიდვაქცინის გამოყენებაზე პირველი ნებართვა უკვე გაცემულია! - რას აკეთებს საქართველო ვაქცინის დროულად მოსაპოვებლად

მასობრივი გაძვირების 3 მიზეზი - ლარი, გაზი, ფქვილი

* * *

კოვიდვაქცინის გამოყენებაზე პირველი ნებართვა უკვე გაცემულია! - რას აკეთებს საქართველო ვაქცინის დროულად მოსაპოვებლად

“დიდი ბრიტანეთი მსოფლიოში პირველი ქვეყანაა, რომელმაც კორონავირუსის საწინააღმდეგო ვაქცინის გამოყენების ოფიციალური ნებართვა გასცა - ქვეყნის მასშტაბით “პფაიზერისა” და “ბიოტექის” ვაქცინა ხელმწისაწვდომი მომავალი კვირიდან იქნება. რა პერსპექტივები აქვს საქართველოს ამ მხრივ, რა პროცედურების გავლა უწევს და კორონავირუსთან ბრძოლის მთავარ იარაღთან ხელმისაწვდომობა რამდენ ხანში გვექნება?” - წერს გაზეთი “რეზონანსი” სტატიაში, სათაურით კოვიდვაქცინის გამოყენებაზე პირველი ნებართვა უკვე გაცემულია! - რას აკეთებს საქართველო ვაქცინის დროულად მოსაპოვებლად.

"დღეს მთავრობამ მიიღო მედიკამენტების და ჯანდაცვის პროდუქტების დამოუკიდებელი მარეგულირებელი სააგენტოს რეკომენდაცია “ფაიზერ-ბიოტექის” ის კოვიდ 19-ის საწინააღმდეგო ვაქცინის გამოყენების დამტკიცების შესახებ”, - ნათქვამია გაერთიანებული სამეფოს მთავრობის მიერ გავრცელებულ განცხადებაში. ამასობაში, საქართველოს უწყებათაშორის საკოორდინაციო საბჭოსთან არსებული საოპერაციო შტაბის უფროსის მოადგილემ, ბერდია სიჭინავამ, მთავრობის ადმინისტრაციაში გამართულ ბრიფინგზე განაცხადა, რომ კოვიდვაქცინაციის პროცესის შეუფერხებელი უზრუნველყოფისთვის სპეციალური ჯგუფია შექმნილი. “შექმნილია სპეციალური სამუშაო ჯგუფი კოვიდვაქცინაციის პროცესის შეუფერხებელი უზრუნველყოფისთვის, რათა ქვეყანა მომზადებული შეხვდეს ვაქცინაციის პროცესის დაწყებას”, - განაცხადა ბერდია სიჭინავამ. როგორც ეპიდემიოლოგი ირაკლი ხმალაძე “რეზონანსთან” აღნიშნავს, საქართველოში ვაქცინის გამოყენების ნებართვას, სამედიცინო და ფარმაცევტული საქმიანობის რეგულირების სააგენტო გასცემს, რომელიც ჯანდაცვის სამინისტროს დაქვემდებარებაშია”, - აღნიშნავს გამოცემა.

“ესაა წამლების მარეგულირებელი სპეციალური სააგენტო “სსიპ”-ი და ამ სერთიფიკატს ჯანდაცვის სამინისტრო გასცემს, რომ ამ ვაქცინის გამოყენება შესაძლოა. ჯერჯერობით ვაქცინასთან დაკავშირებით ინფორმაცია არ მაქვს, ჯერ კონკრეტულად გადაწყვეტილი არაა იმიტომ, რომ სხვა ქვეყნები ჩქარობენ და ჩვენ სიჩქარე არანაირად არ გვაწყობს, იმიტომ, რომ ჯერჯერობით გამოყენება ისე აქტიურად დაწყებული არაა - მარტო ცხოველებზე და რამდენიმე მოხალისეზე რომ კარგი ეფექტია, - ეგრე არაა. საჭიროა, ვიცოდეთ თუ რამდენად ეფექტური იქნება, მერე ვაქცინას რომ გაიკეთებ, ანტისხეული აუცილებლად უნდა გამომუშავდეს, თორემ თუ ანტისხეული არ გამოიმუშავა, ასეთი ვაქცინა რად გვინდა, ეს მომენტები უკვე რომ დალაგდება და ვაქცინის ეფექტურობაც და გამოყენების საშუალება რეალური იქნება, მერე უკვე ჩვენც ვიფიქრებთ მაგაზე. „ჩვენთან ალბათ ვაქცინა უკვე რეალურად იანვარ-თებერვლისკენ იქნება, ორი-სამი თვე სრულიად საკმარისია იმისთვის, რომ გაიგო ვაქცინა რამდენად ეფექტურია და უკურეაქცია აქვს თუ არა”, - აცხადებს გამოცემის კორესპონდენტთან საუბრისას ირაკლი ხმალაძე.

“საქართველოში კორონავირუსის დღიური მაჩვენებლისა და გარდაცვლილთა დინამიკა ისევ უარყოფითია, ჯერ ასე მალე რაოდენობის შემცირება არ მოხდება, იმიტომ, რომ ეს ადამიანები, ვინც ურთიერთობენ, შესაძლოა ავტობუსში არ გადაედოს, მაგრამ სახლში მიდის, მეზობელი ან ახლობელი ხვდება, იგივე მაღაზიაში იკრიბებიან და ა.შ. ბევრ მაღაზიაში ვიცი, რომ დისტანციის დაცვა არ ხდება, რაც ძალიან სამწუხარო ფაქტია. აქედან გამომდინარე, ჯერჯერობით დრო გვჭირდება, რომ მივხვდეთ, ეს შეზღუდვები რამდენად ეფექტური იყო. შეზღუდვებიდან ორიდან სამ კვირაში რაღაცა შემცირება უნდა იყოს. სიმართლე გითხრათ, ცოტა სკეპტიკურად ვუყურებ, რომ არიქა და ჯაჭვი გაწყდეს, ეს არ მოხდება, გამორიცხულია. ეს პირველ რიგში თავი თვითონ ადამიანებმა უნდა დაიცვან და მერე სახელმწიფოს მიერ დაწესებულ შეზღუდვებზე ვილაპარაკოთ. თუმცა წესით უნდა შემცირდეს, ყოველ შემთხვევაში, მესამედით მაინც”, - მიიჩნევს ხმალაძე.

“როგორც “რეზონანსთან” ჯანდაცვის ექსპერტი ვატო სურგულაძე ამბობს, თუ ვაქცინა საკვები პროდუქტებისა და მედიკამენტოზური საშუალებების კონტროლის სამმართველოსა და რომელიმე ევროპული ქვეყნის მიერაა აღიარებული, ამ შემთხვევაში საქართველოში აღიარების მარტივი მეთოდი მოქმედებს. “ჩვენთან ამ ნებართვას ხარისხის კონტროლის სააგენტო გასცემს, რომელიც ჯანდაცვის სამინისტროს ექვემდებარება, რომლის ხელმძღვანელიც არის კაპანაძე, მაგრამ თუ ეს ვაქცინა “ეფ-დი-ეი”-ს ან, რომელიმე ევროპული ქვეყნის მიერ აღიარებული, ჩვენთან არის მარტივი აღიარების მეთოდი, პრაქტიკულად საბუთების შემოტანის შემდეგ, 15 დღეში აღიარებული იქნება. აღიარების პრობლემა არაა იმდენად, რამდენადაც შესყიდვის პრობლემაა, რამდენად დროულად შევისყიდით”, - ამბობს სურგულაძე, რომლის თქმით, “მუქთად არავინ მოგვცემს - შეიძლება რაღაც ნაწილი გაჩუქონ, მაგრამ ეს მთლად მუქთად არ იქნება...” - დასძენს გამოცემა.

“რიგში უნდა ჩადგე, კონტრაქტები გააფორმო. კონტრაქტების შესახებ მე ინფორმაცია არ მაქვს და არ მგონია, რომ ვინმეს ჰქონდეს, მგონია, რომ არაფერი არ მიმდინარეობს, თუმცა შესაძლოა მეშლებოდეს. თუ ასე იმუშავეს, შესაძლოა ამათ ხელში საერთოდ ვერ ვიყიდოთ, გრიპის საწინააღმდეგო ვაქცინის შემოტანა ვერ უზრუნველყვეს დროულად და შესაბამისი რაოდენობით, კორონავირუსთან ბრძოლის მუხლში მხოლოდ 310 მილიონია ჩადებული, როცა ამ წელს 780 მილიონი აიღო, მე არ ვიცი ეს 310 მილიონი რას უნდა ეყოს. თუ მერე ვაქცინების შესყიდვის ცალკე მუხლს გააჩენენ არ ვიცი, მაგრამ ჯერჯერობით ეს მუხლიც არაა ჩაშლილი, ყოველ შემთხვევაში ვერ ვნახე და რა თანხაა გამოყოფილი, ესეც არ ვიცი. ეს ინფორმაცია საჯაროა, ეს საიდუმლო ინფორმაცია არაა, და მე ამის მოპოვება მიჭირს. ძალიან გაურკვეველი სიტუაციაა, თუ ისევე მოიქცევიან, როგორც სეზონური გრიპის ვაქცინის დროს, მაშინ ვაქცინა შესაძლოა ამ წელს საერთოდ არ გვეღირსოს. მაგრამ ღმერთმა არ ქნას, ამას ძალიან სერიოზული მუშაობა სჭირდება, აქ ერთობლივად უნდა იმუშავოს, ჯანდაცვისა და საგარეო საქმეთა სამინისტრომ. მე არავითარ კლებას არ ველოდები, ხედავთ რა ხდება ქუჩებში და საკომენდანტის საათის დროს საავადმყოფოს აყაჩაღებენ და მე არავითარ კლებას არ ველოდები თუ რა თქმა უნდა ხელოვნურად რიცხვებს არ გადააკეთებენ” - დაასკვნის სურგულაძე.

“რუსეთის საგარეო საქმეთა მინისტრის მოადგილე გრიგორი კარასინი ამბობს, რომ რუსეთი მზად არის საქართველოს კორონავირუსის საწინააღმდეგო ვაქცინა “სპუტნიკ V” მიაწოდოს, თუმცა დაავადებათა კონტროლის ეროვნული ცენტრის დირექტორის მოადგილე პაატა იმნაძე აცხადებს, რომ საქართველოში მხოლოდ ის პრეპარატები მოხვდება, რომლებსაც ჯანმო დაამტკიცებს. “არის ქართული რეგულაცია, რომ საქართველოში შემოსული ყველა ვაქცინა, აქამდეც და ამის მერეც, უნდა იყოს ჯანმრთელობის მსოფლიო ორგანიზაციის მიერ პრეკვალიფიცირებული. იგივე ეხება კოვიდის საწინააღმდეგო ვაქცინასაც. ყველამ იცით, რომ ვართ კოვიდის პლატფორმაზე (ჩOVAX), გარდა ამისა მიმდინარეობს ორმხრივი მოლაპარაკებები ვაქცინის გარკვეულ მწარმოებლებთან, იგივე ევროპული თუ ამერიკული მწარმოებლები არიან, რომ კოვიდის პლატფორმის გარეშეც მიიღოს ქვეყანამ ვაქცინა”, - განაცხადა იმნაძემ. მისივე თქმით, ქვეყანაში სხვადასხვა ვაქცინის მისაღებად აქტიური მუშაობა მიმდინარეობს და დასძინა, რომ “ჯერჯერობით რუსულ ვაქცინაზე ლაპარაკი არ არის”, - წერს სტატიის ავტორი.

მასობრივი გაძვირების 3 მიზეზი - ლარი, გაზი, ფქვილი

“საქართველოში საკონდიტრო პროდუქცია კიდევ მეტად გაძვირდება. მომავალ წელს დაანონსებული გაზის გაძვირება, პურის საწარმოების გარდა, ყველაფრის ფასზე აისახება. მათ შორის რესტორნებზე, კვების ობიექტებზე და ა.შ. ფასი მოიმატებს თონის პურზეც, რადგან “თბილისი ენერჯიმ” ტარიფი თონეებსაც გაუზარდა. მცირე და საშუალო ბიზნესი პანდემიის პირობებში ისედაც ძალიან დაზარალდა. მომავალი წლიდან კი, კომერციული მომხმარებლებისთვის გაზის გადასახადის ზრდა, მათ პროდუქციას კიდევ მეტად გააძვირებს. მართალია, კომერციული მომხმარებლებისთვის გაზის გაძვირება პურის საწარმოებს არ ეხება, რის გამოც ქარხნული პური არ გაძვირდება, მაგრამ უმთავრესი მოხმარების პროდუქციის ღირებულება მოიმატეს თონეებში, სადაც არავითარი შეღავათი არ მოქმედებს. პარალელურად კი გაძვირდება სხვადასხვა ტიპის საკონდიტრო ნაწარმიც”, - წერს გაზეთი “რეზონანსი” სტატიაში, სათაურით მასობრივი გაძვირების 3 მიზეზი - ლარი, გაზი, ფქვილი / “ეს პროცესი კიდევ გაგრძელდება, რადგან მთავრობა ამ საკითხებს ვერ არეგულირებს”.

“საქართველოს ხორბლისა და ფქვილის მწარმოებელთა ასოციაციაციის თავმჯდომარის ლევან სილაგავას განცხადებით, ბუნებრივი აირის დაანონსებული ზრდა არ აისახება მხოლოდ დიდ პურის ქარხნებზე. “მთლიანობაში, გაზის ტარიფი პურის მწარმოებლებზე ასახული არ არის. შესაბამისად, აქ არის გამონაკლისი და ამ შემთხვევაში, პურის მწარმოებლები დღეს ამაზე დამოკიდებულები აღარ იქნებიან. ასოციაციის სახელით მინდა განვაცხადო, რომ მსოფლიო ბაზარზე ტენდენციები საკმაოდ არასახარბიელოა, ყველგან მარცვლეული გაძვირებულია. მთელ მსოფლიოში 8 ქვეყანაა, რომელიც მსოფლიოს ხორბალს აწვდის: აშშ, კანადა, ავსტრალია, არგენტინა, ევროკავშირი, რუსეთი, უკრაინა და ყაზახეთი. შესაბამისად, აქედან 6 ქვეყანაში არის პრობლემა - მოუსავლიანობა. მხოლოდ რუსეთში და ავსტრალიაში არის შედარებით უკეთესი მოსავალი, თუმცა, ეს 2 ქვეყანა 6-ს ვერ აბალანსებს. მეორე ფაქტორი არის ის, რომ პანდემიის ახალი ტალღის მოლოდინში სასურსათო უსაფრთხოების პრობლემები შეიქმნა ქვეყნებში. ახლა აჟიოტაჟურად ყველა ქვეყანა ცდილობს უფრო მეტი ხორბალი იყიდოს, ვიდრე შარშან. დაახლოებით 20-30%-ით მეტი ხორბლის შესყიდვა ხდება მსოფლიოში”, - განაცხადა ლევან სილაგავამ და დასძინა, რომ დამატებითი უარყოფითი ფაქტორი არის ლარის კურსის დოლართან მიმართებით რყევა, რაც ხორბლის ფასზე შესაბამისად აისახება”, - აღნიშნავს გამოცემა.

“გავრცელდა ინფორმაცია, რომ ფქვილი ყველგან 53 ლარი იქნება. ეს ასე არ არის. 53 ლარი იქნება პურის ქარხნებისთვის მისაწოდებელი ფასი, რომელიც ტენდერის საშუალებით გამოცხადება და იქნება იმ სიის ჩამონათვალი, რომელსაც ჩვენ მოგვცემს პურის ასოციაცია. შესაბამისად, მხოლოდ ამ ქარხნებისთვის მოწოდებული იქნება 53 ლარად, ფიქსირებულ ფასად მიწოდებული. ეს არის თვეში 10 ათასი ტონა ფქვილი. სულ კი საქართველოს 1 თვეში დაახლოებით 30 ათასი ტონა ფქვილი სჭირდება. დანარჩენ 20 ათასზე იქნება თავისუფალი ფასები. ეს არის საგემოვნო პურები, იგივე თონის პური, გერმანული, ავსტრიული, ლიტვური პური. შესაბამისად, შეღავათი მოქმედებს მხოლოდ 10 ათას ტონაზე”, - აღნიშნა სილაგავამ. იანვრიდან კი ვითარება იმაზე რთული შეიძლება იყოს, ვიდრე წელს, რადგან ბუნებრივი აირის გაძვირება, ყველაფრის თვითღირებულებას გაზრდის. აკადემიკოსი პაატა კოღუაშვილი პირდაპირ ამბობს, რომ გაისად რესტორნებში, კვების ობიექტებსა და საკონდიტროებში პროდუქცია გაძვირდება”, - დასძენს გამოცემა.

“პური ისედაც გაძვირებულია 20 თეთრით. ხორბლის ფასი რუსეთში უკვე დადგენილია, 1 ტონაზე - 245-250 დოლარი, უკრაინში - 230-დან 250-დოლარამდე. საფრანგეთში - 235 დოლარი. პარალელურად იზრდება გაზის ტარიფი. რესტორნებში, კვების ობეიქტებსა და საკონდიტროებში გაძვირება აუცილებლად მოხდება. ამას დაემატება ის პროცესი, რომელიც მიმდინარეობს - სოფლის მეურნეობის პროდუქტების გაძვირება. სამწუხაროდ, ეს პროცესი კიდევ გაგრძელდება, რადგან ჩვენი მთავრობა ამ საკითხებს ვერ არეგულირებს. ყველა ბერკეტი გაუშვეს ხელიდან, ე.წ. ფსევდოლიბერალური ხედვების გამო”, - აცხადებს გამოცემის კორესპონდენტთან საუბრისას პაატა კოღუაშვილი.

“საკონდიტრო ნაწარმზე პანდემიის პირობებში, წელს ფასმა ისედაც მოიმატა. გაისად კი, მათთვის გაზის გაზრდილი ტარიფი აუცილებლად იქონიებს გავლენას. მეტროსადგურ “დიდუბის” მიმდებარე ტერიტორიაზე არსებული ერთ-ერთი საკონდიტროს თანამშრომელი აცხადებს, რომ წელს ფასმა, საშუალოდ, 20-30 თეთრით მოიმატა. ჩვენ დიდი ხანია უკვე ამ საქმით ვარ დაკავებული და ასეთი გაძვირების წინაშე არ ვყოფილვართ. რეალიზაცია დიდწილად ფუნთუშებსა და ღვეზელების ხარჯზე ხდება, რომელიც ფასმაც კორონავირუსის გამო, საშუალოდ 20-30 თეთრით მოიმატა. სხვა გზა არ გვქონდა, რადგან ფქვილი ძალიან გაძვირებულია და ეროვნული ვალტა ხომ საერთოდ "გაქცეულია". ახლა გაზის გაძვირებაც დაანონსდა, რაც ასევე იმოქმედებს ფასზე. ყველანაირად ვეცდებით, რომ არ ფასი შევინარჩუნოთ, რადგან შეიძლება, ამის გამო კლიენტები დავკარგით, მაგრამ რა თქმა უნდა, ეს რთული იქნება. ვნახოთ, იანვრიდან რა პრობლემების წინაშე აღმოვჩნდებით”, - განაცხადა ერთ-ერთი საკონდიტროს თანამშრომელმა, რომლის თხოვნითაც მის ვინაობას არ ვასახელებთ”, - წერს სტატიის ავტორი.

ზვიად კირტავა - ფრთხილი ოპტიმიზმი შეიძლება მქონდეს, რომ შევძლებთ მოსახლეობის საყოველთაო ვაქცინაციას, მაგრამ ჯერჯერობით ფრთხილი, - გეგმა არ გვინახავს
ქართული პრესის მიმოხილვა 22.01.2021
რა გეგმები აქვს ქუთაისის საერთაშორისო უნივერსიტეტს და რა პროგრამებს სთავაზობს სტუდენტებს? - ინტერვიუ უნივერსიტეტის კანცლერ მაგდა მაღრაძესთან
ბათუმში ბალნეოლოგიურ-გამაჯანსაღებელი ცენტრი აშენდება
2020 წელს ინტელიექსპრესის მიერ საქართველოში შემოტანილი ფულადი გზავნილების მოცულობამ 265 მილიონ დოლარს გადააჭარბა
ეფექტური გზა რესპირაციული ინფექციების პრევენციისთვის