დავით ბაქრაძე - ეს პარლამენტი ვერცერთ ძირითად ფუნქციას სრულფასოვნად ვერ შეასრულებს, რაც ის სამწუხარო რეალობაა, რომელიც ქვეყანაში გაყალბებულმა არჩევნებმა შექმნა

ეს პარლამენტი პარლამენტის ვერცერთ ძირითად ფუნქციას სრულფასოვნად ვერ შეასრულებს და ეს არის ის სამწუხარო რეალობა, რომელიც ქვეყანაში გაყალბებულმა არჩევნებმა შექმნა, - ამის შესახებ „ევროპული საქართველოს“ ლიდერმა დავით ბაქრაძემ „პალიტრანიუსის“ გადაცემა „დღის ნიუსრუმში“ მეათე მოწვევის პარლამენტის შემადგენლობის შეფასებისას განაცხადა, რომელსაც ოპოზიციამ ბოიკოტი გამოუცხადა.

მისი განმარტებით, წარმომადგენლობითი ორგანო გულისხმობს, რომ ის უნდა წარმოადგენდეს ხალხს და უნდა წარმოადგენდეს პოზიციების იმ მრავალფეროვნებას, რომელიც ამომრჩეველსა და ქვეყანაშია.

როგორც ბაქრაძემ აღნიშნა, პარლამენტი, სადაც არის ერთი პარტია, განსაზღვრების მიხედვით ვერ იქნება წარმომადგენლობითი ორგანო.

„ეს ვერ იქნება პარლამენტი, რომელიც წარმოადგენს განსხვავებულად მოაზროვნე ადამიანებს, ვისაც არ მოსწონს დღევანდელი ხელისუფლება. ეს ვერ იქნება პარლამენტი, სადაც იქნება პოლიტიკური დებატები და განსხვავებული აზრების, თუნდაც, მწვავე დაპირისპირება, რაც კიდევ ერთი ფუნქციაა პარლამენტის. ეს იქნება პარლამენტი, სადაც ვერ მოხერხდება მთელი რიგი კანონების მიღება. ვერ შეძლებს ვერც მთავრობის ზედამხედველობას, რადგან მხოლოდ ერთი პარტიაა, რომელიც თვითონ აკონტროლებს მთავრობას, თვითონ ქმნის მთავრობას და თვითონ არის მთავრობის ნაწილი. ამიტომ პარლამენტის ვერც ერთ ძირითად ფუნქციას ეს პარლამენტი სრულფასოვნად ვერ შეასრულებს და ეს არის ის სამწუხარო რეალობა, რომელიც ქვეყანაში შექმნა გაყალბებულმა არჩევნებმა,“- განაცხადა დავით ბაქრაძემ.

კითხვაზე, ნიშნავს თუ არა ეს იმას, რომ მეათე მოწვევის პარლამენტის ფუნქციონირების ვადა კანონით დადგენილზე ნაკლები შეიძლება იყოს, დავით ბაქრაძემ განაცხადა, რომ შექმნილი ვითარება ავტომატურად ამას არ ნიშნავს, თუმცა იმედი აქვს, რომ ეს ასე იქნება.

„არსებობენ მთელი რიგი ქვეყნები, სადაც არიან ერთპარტიული პარლამენტები. ქვეყანაში, სადაც ერთპარტიული პარლამენტი ერთი სრული ვადით ძლებს, როგორც წესი, მეორე ვადით მრავალპარტიული პარლამენტი აღარ აირჩევა და რჩება ერთპარტიულ ქვეყნად. ამიტომ, მე, ნამდვილად, არ მემეტება საქართველო, რომ ასეთი ქვეყნების რიცხვში იყოს და იმედი მაქვს, რომ რაღაც პერიოდის შემდეგ და რაც შეიძლება ხანმოკლე პერიოდის შემდეგ, ყველა ერთად ამ ქვეყანაში მივაღწევთ ნორმალური, თავისუფალი არჩევნების ჩატარებას და ნორმალური პარლამენტის არჩევას, როგორიც ეკადრება საქართველოს - მრავალპარტიული, განსხვავებული შეხედულებებით, მწვავე, მაგრამ მრავალპარტიული პარლამენტის არჩევას, როგორიც სჭირდება ქვეყანას“, - განაცხადა დავით ბაქრაძემ.

ვლადიმერ ფესენკო - უკრაინის გარეშე უკრაინის მომავალზე შეთანხმების ნებისმიერი მცდელობები დამარცხებისთვისაა განწირული
დავით თვალაბეიშვილი - ჩვენ მხარს ვუჭერთ ევროკავშირის ენერგეტიკული გაერთიანების მედიაციის გაგრძელებას და მოვუწოდებთ მასში ჩართულ ყველა მონაწილეს, გამოვიყენოთ ეს შესაძლებლობა
ქართული პრესის მიმოხილვა 23.07.2021
თორნიკე შარაშენიძე - ხელისუფლების სერიოზული შეცდომა იყო ვაშინგტონისთვის არასწორი ინფორმაციის მიწოდებაში აშშ-ს ელჩის დადანაშაულება, შესაძლოა, ეს ამბავი მათ მომავალში ცუდადაც კი დაუბრუნდეთ
პირველად საქართველოში - დავით ტატიშვილის სამედიცინო ცენტრში უნიკალური ოპერაცია ჩატარდა
მინერალური წყალი „ბორჯომი“ ახალ კამპანიას იწყებს
„სინერჯი“ თევზის კომპანია „უმალის“ პარტნიორი გახდა
დავით ტატიშვილის სამედიცინო ცენტრმა ამჯერად ახალი ამბულატორიული ცენტრი აჭარის რეგიონში, ბათუმში გახსნა