ბექა დავითულიანი - მოლაპარაკებების არეალი დავიწროვდა - მმართველმა პარტიამ ოპოზიციას ყველა ტიპის კომპრომისი შესთავაზა, რაც კი შეიძლება შეეთავაზებინა

ქართველი ხალხის არჩევანი გადახედვას ვერ დაექვემდებარება, - ამის შესახებ "ქართული ოცნების" დეპუტატმა ბექა დავითულიანმა ოპოზიციასთან მოლაპარაკებების თაობაზე დასმული კითხვის პასუხად განაცხადა.

დავითულიანის შეფასებით, მოლაპარაკებების არეალი დავიწროვდა - "მმართველი გუნდის პოზიცია მკაფიოა, ხოლო ოპოზიცია ამბობს, რომ ამ პოზიციას არ ეთანხმება".

„მმართველმა პარტიამ ოპოზიციას ყველა ტიპის კომპრომისი შესთავაზა, რაც კი შეიძლება შეეთავაზებინა - გარდა ერთისა, რაზეც თავიდანვე ვთქვით, რომ წითელი ხაზია. ქართველი ხალხის არჩევანი ჩვენი მხრიდან რევიზიას ვერ დაექვემდებარება“, - განაცხადა ბექა დავითულიანმა.

დეპუტატის თქმით, პარლამენტში უნდა იყოს ოპოზიცია, მაგრამ „ოპოზიციამ საკუთარი არჩევანი თავად გააკეთა, როცა ხალხის მიერ მინიჭებულ მანდატზე უარი თქვა“.

„მთლიანი ხელისუფლება კი მათთვის ხალხს არ მიუნიჭებია. მათი პასუხისმგებლობაა - უნდათ განახორციელებენ დაკისრებულ უფლებამოსილებას, უნდათ - არ განახორციელებენ“, - დასძინა დავითულიანმა.