ეუთო-ს საპარლამენტო ასამბლეის ადამიანის უფლებათა კომიტეტი - ალექსეი ნავალნის დაკავება მიუღებელია, რუსეთის ხელისუფლებას პოლიტიკურად მოტივირებული დევნის შეწყვეტისკენ მოვუწოდებთ
ეუთოს საპარლამენტო ასამბლეის ადამიანის უფლებათა კომიტეტი ალექსეი ნავალნის დაკავების ფაქტს ეხმიანება და რუსეთის ხელისუფლებას ეუთო-ს ადამიანის უფლებათა ევროპული კონვენციით ნაკისრი ვალდებულებების შესრულებისკენ მოუწოდებს.
„რუსეთის ხელისუფლების მიერ ალექსეი ნავალნის დაკავება მიუღებელია. ეუთო-ს ტერიტორიაზე ნებისმიერი მთავრობის პოლიტიკურ ოპონენტებს უნდა ჰქონდეთ საკუთარი აზრის გამოხატვის უფლება. ჩვენ მოვუწოდებთ რუსეთის ხელისუფლებას, შეასრულოს ეუთო-ს ადამიანის უფლებათა ევროპული კონვენციით ნაკისრი ვალდებულებები და შეაჩეროს პოლიტიკურად მოტივირებული დევნა. ბატონი ნავალნის პოლიტიკური პროგრამა ამომრჩეველმა უნდა შეისწავლოს და არა პროკურორებმა,” - აღნიშნულია ეუთო-ს მიერ გავრცელებულ განცხადებაში.
დოკუმენტს ხელს აწერენ, კომიტეტის თავმჯდომარე კირიაკოს ჰაჯიიანნი (კვიპროსი), თავმჯდომარის მოადგილე მიქაელ გეორგ ლინკი (გერმანია) და მომხსენებელი კარი ჰენრიკსენი (ნორვეგია).
