ევროკავშირის ანგარიში საქართველოს მიერ 2020 წლის განმავლობაში ასოცირების შეთანხმების შესრულების შესახებ დადებითად აფასებს საქართველოს მთავრობის მიერ გადადგმულ კონკრეტულ ნაბიჯებს მთელ რიგ სფეროებში, მათ შორის შრომითი უფლებების გაძლიერება - შრომის კოდექსში განხორციელდა არსებითი ცვლილებები, რომელიც დასაქმებულის დაცვის მთელ რიგ მექანიზმებს ამკვიდრებს და ასევე იცავს დისკრიმინაციისგან.

საგარეო საქმეთა სამინისტროს ინფორმაციით, გარდა ამისა, ანგარიშში ნათქვამია, რომ ცვლილებები შევიდა შრომის ინსპექციის სამსახურის შესახებ კანონში, რითიც სამსახურს გაუფართოვდა უფლებამოსილება და მიენიჭა მეტი დამოუკიდებლობა.

საგარეო საქმეთა სამინისტროს განმარტებით, ანგარიში აღიარებს ქვეყნის ძალისხმევას უვიზო რეჟიმის მოთხოვნების შესრულების კუთხით, რასაც ადასტურებს ასევე ევროკომისიის მიერ გამოქვეყნებული შესაბამისი რიგით მესამე (VLAP) ანგარიში.

„ბავშვთა უფლებების დაცვის შესახებ კოდექსი შევიდა ძალაში და ქმედითია, რომელიც ქმნის მნიშვნელოვან გარანტიებს ბავშვის უფლებებისა და თავისუფლების დასაცავად; გადაიდგა შემდგომი ნაბიჯები საჯარო მმართველობის რეფორმის ფარგლებში, რომელიც ქვეყანაში ევროპული სტანდარტების შესაბამისი საჯარო მმართველობის და საჯარო პოლიტიკის წარმოების საფუძველს ქმნის. პანდემიით გამოწვეული ეკონომიკური და ფისკალური გამოწვევების მიუხედავად, ევროკავშირის ანგარიში აღიარებს, რომ საქართველომ შეინარჩუნა წარმატებული პოზიციები საერთაშორისო რეიტინგებში, მათ შორის მსოფლიო ბანკის თანახმად ბიზნეს გარემოს მხრივ ქვეყანა მე-7 ადგილს იკავებს 190 ქვეყანას შორის და ბიზნესის დაწყების სიმარტივის მხრივ მსოფლიოში მეორე ადგილზეა. მიუხედავად შემცირებული ვაჭრობისა, ევროკავშირი როგორც ერთიანი სავაჭრო ბლოკი, რჩება საქართველოს უმსხვილეს სავაჭრო პარტნიორად. ანგარიში მიესალმება ევროკავშირის ბაზარზე ქართული პროდუქციის სახეობების გაფართოებას, კერძოდ ხაზგასმულია, რომ ევროკომისიამ 2020 წლის შემოდგომაზე ბაზარზე დაუშვა საქართველოში წარმოებული ცხოველის საკვები და მიმდინარეობს მუშაობა აკვაკულტურის აღიარებაზე.

პოზიტიურად არის შეფასებული სახელმწიფოს მხრიდან მცირე და საშუალო საწარმოთა მხარდაჭერის ღონისძიებები და ინიციატივები, განსაკუთრებით კოვიდ-19-ით გამოწვეული კრიზისის პირობებში.

ანგარიში ასევე დადებითად აფასებს ევროკავშირის ნორმებსა და სტანდარტებთან დაახლოების დინამიკას და ხაზს უსვამს ისეთ საკანონმდებლო ნაბიჯებს, როგორიცაა ცვლილებები კონკურენციის შესახებ კანონში, სახელმწიფო შესყიდვებისა და ინტელექტუალური საკუთრების უფლებების კანონმდებლობაში; ტყის ახალი კოდექსი, რომელიც ტყის მდგრადი მართვის სისტემას აყალიბებს; ენერგოეფექტურობის საკანონმდებლო პაკეტი, რომელიც ქვეყანაში ენერგოეფექტურობის პოლიტიკის გატარებას შეუწყობს ხელს და სხვა.

ანგარიში უაღრესად დადებითად აფასებს ქვეყნის მონაწილეობას ევროკავშირის ისეთ პროგრამებში როგორიცაა ერასმუს+ შემოქმედებითი ევროპა და ჰორიზონტი 2020; ასევე მიესალმება ქვეყნის ნაყოფიერ თანამშრომლობას ევროკავშირის სააგენტოებთან: Frontex, Europol და Eurojust“,- აღნიშნულია ინფორმაციაში.