პარტია „მოქალაქეების“ ლიდერის, ალეკო ელისაშვილის განცხადებით, მზადაა „ნაციონალური მოძრაობის“ თავმჯდომარე ნიკა მელიას გირაოს შესაგროვებლად თავისი ხელფასი გადაურიცხოს.

როგორც ელისაშვილმა ჟურნალისტებთან აღნიშნა, „ორჯერ 30 000 ლარის გადახდის საშუალება გასაგებია, რომ არავის აქვს“.

მანვე აღნიშნა, რომ არაა ნორმალური ოპოზიციური პარტიის ხელმძღვანელს, ვინც არ უნდა იყოს, სადეპუტატო იმუნიტეტი მოუხსნა და თუ ამ მექანიზმს სპობ და აშორებ, ე.ი. ოპოზიციას ებრძვი.

„რაც შეეხება ნიკას, ეთერში მე მომმართა და თქვა, რომ ერთხელ გირაო გადავიხადეო, ახლა კიდევ დამაკისრესო და ამდენი თანხა არ მაქვსო, რომ მეორეჯერ გირაო გადავიხადოო - გასაგებია, ორჯერ 30 000 ლარი არავის აქვს, მეც არ მაქვს! ნიკასადმი ჩემი ადამიანური დამოკიდებულებით, მე მაგალითად, აქ ხელფასი არ ჩამრიცხვია ჯერ, მაგრამ მზად ვარ, ჩემი ხელფასი გადავურიცხო. ადამიანურად მზად ვარ!

ახლა ამ კომიტეტის წევრი არა ვარ, უბრალოდ, მაინტერესებდა განწყობა, როგორც „ქართული ოცნების“ წარმომადგენლების, ასევე პროკურორის. გასაგებია, რომ ისინი პროკურორის მოთხოვნის დაკმაყოფილებას აპირებენ, რომ ნიკა მელიას უფლებამოსილება შეუჩერონ. ჩვენ, რა თქმა უნდა, ამას მხარს არ ვუჭერთ! არაა სწორი ოპოზიციური პარტიის ხელმძღვანელს ვინც არ უნდა იყოს, როგორც არ უნდა გულზე გეხატებოდეს და როგორც არ უნდა მოგწონდეს, ოპოზიციური პარტიის ხელმძღვანელისთვის იმუნიტეტის შეჩერება არაა ნორმალური! სახალხო დამცველის მოსაზრებას აბსოლუტურად ვიზიარებ, რომ ნორმალური არაა, როდესაც პარტიის წარმომადგენელს, ან თავმჯდომარეს პარლამენტი უხსნის იმუნიტეტს. პირველ რიგში, იმუნიტეტი ოპოზიციონერი დეპუტატების დაცვის მექანიზმია, როცა ამ მექანიზმს სპობ და აშორებ ე.ი. ოპოზიციას ებრძვი!“, - აღნიშნა ელისაშვილმა.

იხილეთ ვიდეო:ალეკო ელისაშვილი მზად არის ნიკა მელიას საკუთარი ხელფასი გადავურიცხოს