Pfizer-მა და BioNTech-მა ერთობლივად შექმნილი კორონავირუსის საწინააღმდეგო ვაქცინის - BNT162b2-ის - ფეხმძიმეებზე გამოცდა დაიწყეს.
როგორც კომპანიების მიერ გავრცელებულ განცხადებაშია ნათქვამი, კვლევის მიზანი მათი ვაქცინის 18 წლისა და ზემოთ ასაკის ჯანმრთელ ფეხმძიმეებში გამოყენების უსაფრთხოების, ამტანობისა და იმუნოგენურობის შეფასებაა.
„ფაზა 2/3-ის კვლევის ფარგლებში 18 წლის ან უფროსი ასაკის დაახლოებით 4 000 ჯანმრთელ ორსულ ქალს ორსულობის 24-34 კვირის ვადაზე აცრიან. კვლევა BNT162b2-ის ან პლაცებოს ორი დოზის, რომელიც 21 დღის ინტერვალით მიიღება, უსაფრთხოებას, ამტანობას და იმუნოგენურობას შეაფასებს. თითოეული ქალი კვლევაში დაახლოებით 7-დან 10 თვემდე პერიოდით იქნება ჩართული,“ - აღნიშნულია კომპანიების მიერ გავრცელებულ ინფორმაციაში.
მათივე განმარტებით, კვლევა ასევე შეაფასებს ვაქცინის უსაფრთხოებას ვაქცინირებული ორსული ქალების ახალშობილებში და დამცავი ანტისხეულების ახალშობილებზე გადაცემას.
„ახალშობილებზე დაკვირვება დაახლოებით ექვსი თვის ასაკამდე მოხდება,“- აღნიშნულია განცხადებაში.