საქართველოს საგარეო საქმეთა მინისტრი დავით ზალკალიანი ლატვიის საგარეო საქმეთა მინისტრს ედგარს რინკევიჩს ესაუბრა.
როგორც „ინტერპრესნიუსს“ საგარეო საქმეთა სამინისტროდან აცნობეს, მინისტრებმა ხაზი გაუსვეს ორი ქვეყნის გამორჩეულ მეგობრობას და საქართველოს ევროპული და ევროატლანტიკური მისწრაფების მიმართ ლატვიის ურყევ მხარდაჭერას.
საქართველოში მიმდინარე პროცესებზე საუბრისას მინისტრებმა აღნიშნეს ვითარების დეესკალაციის და კონსტრუქციული დიალოგის მნიშვნელობა და ხაზი გაუსვეს იმ მნიშვნელოვან პროგრესს, რასაც ქვეყანამ მიაღწია ევროპული და ევროატლანტიკური ინტეგრაციის, ასევე ქვეყნის დემოკრატიული განვითარების პროცესში.
„მინისტრებმა გამოთქვეს მზადყოფნა მომავალშიც ითანამშრომლონ როგორც აღნიშნულ საკითხებზე, ასევე ორი ქვეყნის ურთიერთობების შემდგომი განმტკიცებისა და სხვა აქტუალურ რეგიონალურ თუ საერთაშორისო საკითხებზე. მინისტრებმა გამოთქვეს მაღალ დონეზე ვიზიტების გაცვლის სურვილი“,- ნათქვამია ინფორმაციაში.