ძალიან მნიშვნელოვანი შეხვედრა გვქონდა პოლიტიკური პარტიების ლიდერებთან და პრემიერ- მინისტრთან. გვქონდა შესაძლებლობა, მოგვესმინა ერთმანეთისთვის და გავაცნობიერეთ, რომ არსებობს ბევრი რთული საკითხი, რომელიც უნდა გადაიჭრას, -ამის შესახებ ევროპული საბჭოს პრეზიდენტმა, შარლ მიშელმა ხელისუფლებისა და ოპოზიციის წარმომადგენლებს შორის გამართული შეხვედრის შემდეგ განაცხადა.

„მე შევთავაზე ევროკავშირის მხარდაჭერა განსხვავებულ საკითხებზე პოზიტიური ძალისხმევის გასაძლიერებლად. ორ კვირაში ბრიუსელში გვექნება საქართველოსთან ასოცირების საბჭოს მომავალი სხდომა, იმისთვის, რომ დავაკვირდეთ, რა პროგრესია მიღწეული სხვადასხვა რთულ საკითხზე. მთავარი გზავნილი შემდეგია: საქართველოს მოქალაქეების ინტერესების დაცვა. ამ ქვეყანაში ბევრი რთული გამოწვევაა: ეკონომიკური განვითარება, სოციალური ვითარება, კოვიდ-19, უსაფრთხოება, სტაბილურობა. ეს არის ძალიან მნიშვნელოვანი გამოწვევები, რომლებსაც უნდა გავუმკლავდეთ. სწორედ ამიტომ სასწრაფოდ უნდა გადაიჭრას ეს პოლიტიკური კრიზისი“, - განაცხადა შარლ მიშელმა.