ორი ფუნდამენტური საკითხი კვლავ პრობლემური რჩება - ერთი, ეს არის საარჩევნო სისტემა და მეორეა - საარჩევნო ადმინისტრაცია, - აღნიშნული შეფასება სამუშაო რეფორმაზე მომუშავე ჯგუფის დღევანდელი შეხვედრის დასრულების შემდეგ, არასამთავრობო ორგანიზაცია “ახალგაზრდა იურისტთა ასოციაციის“ წარმომადგენელმა ვახუშტი მენაბდემ გააკეთა.

მენაბდის თქმით, ტექნიკურ ნაწილში ბევრ ინიციატივაზე შეთანხმება მიღწეულია და ამ მიმართულებით საარჩევნო კანონი უკეთესი იქნება.

“შემუშავდა საინტერესო დებულებები, მაგრამ ყველაზე მნიშვნელოვანი საკითხები, როგორიც არის საარჩევნო ადმინისტრაციის დაკომპლექტება და ადგილობრივ დონეზე საარჩევნო სისტემა, კვლავ შეუთანხმებელი რჩება. გვესმის, რომ ეს არის ოპოზიციასა და ხელისუფლებას შორის იმ მოლაპარაკებების ნაწილი, რომელიც შარლ მიშელის ჩამოსვლის შემდეგ დაიძრა. ვფიქრობთ, აღნიშნული საკითხები მსჯელობის საგანი გახდება“, - განაცხადა მენაბდემ შეხვედრის დასრულების შემდეგ.

“საარჩევნო კოდექსში“ დაგეგმილი ცვლილებების პროექტის საბოლოო ვარიანტით, ცესკოსა და საოლქო კომისიების წევრთა რაოდენობა 17-მდე იზრდება და 8-პროფესიული და 9-პარტიული წევრის პრინციპით დაკომპლექტდება. ამასთან, საარჩევნო ადმინისტრაციებში 9 წევრს პარტიები შემდეგ შემთხვევაში დანიშნავენ: თუ პარტიას მიეკუთვნა პარლამენტის წევრის მანდატი, ეკუთვნის საბიუჯეტო დაფინანსება და ჰყავს სულ მცირე ერთი წევრი მაინც, რომელიც პარლამენტის წევრის უფლებამოსილებას ახორციელებს.