რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარი სახერხი საამქროს მფლობელ მეწარმეებს, მათივე თხოვნით შეხვდა. ამის შესახებ „ინტერპრესნიუსს“ საქართველოს პარლამენტიდან აცნობეს.

მათივე ინფორმაციით, ხე-ტყის გადამამუშავებელი სახერხი საამქროების მფლობელები გარკვეულ რეგულაციებთან დაკავშირებით კანონმდებლებისგან დახმარებას ითხოვენ.

„ჩვენ ვაპირებთ, რომ შესაბამის უწყებებთან - ეს არის ფინანსური პოლიცია, საგადასახადო, სატყეო დეპარტამენტი, ვიმუშაოთ რეალურად, გავერკვეთ, რამდენად საფუძვლიანია ის პრეტენზიები, რომლებიც მეწარმეებს აქვთ და შესაბამისად, მივიღოთ ისეთი რეგულაციები, რომ არც იმ შედეგიდან დავიხიოთ უკან, რომელიც აღრიცხვიანობის მოწესრიგებას უკავშირდება, მაგრამ მეწარმეებისთვისაც არ იყოს ეს რეგულაციები მძიმე ტვირთი", - განაცხადა სოზარ სუბარმა შეხვედრის შემდეგ.

საქართველოს პარლამენტის მიერ გავრცელებული ინფორმაციით, 1-ლი აპრილიდან საქართველოს ტერიტორიაზე ხე-ტყის მოძრაობის წესებისა და მრგვალი ხე-ტყის (მორის) პირველადი გადამუშავების ობიექტის (სახერხი საამქროს)ტექნიკური რეგლამენტის თაობაზე მთავრობის რამდენიმე წლის წინ მიღებული დადგენილება უნდა ამოქმედდეს, რომელიც, მათ შორის, სახერხი საამქროების ვიდეო მონიტორინგის სისტემით აღჭურვას ითვალისწინებს.

შეხვედრაზე აღინიშნა, რომ ბოლო წლებში აღრიცხვიანობის გაუმჯობესების თვალსაზრისით გადადგმული ნაბიჯები კარგია, თუმცა სახერხი საამქროს მფლობელის განმარტებით, არის გარკვეული რეგულაციები, რომლებსაც დახვეწა სჭირდება, ზოგიერთი რეგულაციის მიღება უნდა გადაიდოს, ხოლო ზოგიერთი რეგულაცია, საერთოდ უნდა გაუქმდეს.

მათი განმარტებით, კოვიდ-სიტუაციამ და ეკონომიკურმა ვარდნამ ხელი შეუშალა მათ ბიზნესსაც და შესაბამისად, ახალი რეგულაციები მათ მძიმე ტვირთად დააწვება.

მეწარმეებს პარლამენტის წევრები ვიქტორ ჯაფარიძე და ანზორ ბოლქვაძეც შეხვდნენ.