ლევან იოსელიანი - ევროკავშირი ასე მარტივად არ დაგვანებებს თავს - ორივე მხარეს აიძულებს, რომ შეთანხმება შედგეს

ევროკავშირი ასე მარტივად არ დაგვანებებს თავს, დარწმუნებული ვარ, ორივე მხარეს აიძულებენ, რომ შეთანხმება შედგეს - ევროკავშირს არ აინტერესებს ერთჯერადად ცეცხლის ჩაქრობა, - ამის შესახებ “მოქალაქეების“ ერთ-ერთმა ლიდერმა ლევან იოსელიანმა „პალიტრანიუსის“ გადაცემაში „ნიუსრუმი“ ევროპული საჭოს პრეზიდენტის შარლ მიშელის სპეციალური წარმომადგენლის კრისტიან დანიელსონის საქართველოში მორიგ ვიზიტთან დაკავშირებით განაცხადა.

მისი თქმით, ევროკავშირი ყველაფერს გააკეთებს იმისთვის, რომ საქართველოში პოლიტიკური კრიზისი განიმუხტოს.

„ველოდი, რომ ევროკავშირი ასე მარტივად არ დაგვანებებს თავს იმიტომ, რომ ეს ბოლოს და ბოლოს მისი პრესტიჟის საკითხიც არის, როდესაც ახალი მაღალი რანგის პოლიტიკოსი არის ჩართული მედიაციაში, როგორიც არის შარლ მიშელი და ვერ დაალაგა სიტუაცია. ამიტომ ისინი ამ საქმეს ბოლომდე მიიყვანენ. დარწმუნებული ვარ, ორივე მხარეს აიძულებენ, რომ შედგეს შეთანხმება. ორივე მხარეს მოუწევს კომპრომისული ნაბიჯების გადადგმა. პოლიტიკური კრიზისის განმუხტვა უნდა ემსახურებოდეს საქართველოში რაღაცა ტიპის ინსტიტუციურ წინსვლას. ამიტომ ვხედავთ დღეს შესაძლებლობას, რომ სასამართლოს და პროკურატურის საკითხი უნდა იყოს წამოწეული და თვითონ პარლამენტში ოპოზიციის ჩართულობის საკითხი იყოს მეტად წამოწეული და რეალური დემოკრატიული ინტსრუმენტები ჰქონდეს ოპოზიციას და არ იყოს მარტივი „ქართული ოცნების“ გადაწყვეტილების მიღება, თუნდაც დაინიცირება და გატანა. ასე რომ, ეს აინტერესებს ჩვენ მოკავშირეებს, მათ არ აინტერესებთ აქ ერთჯერადად ცეცხლის ჩაქრობა. ევროკავშირსაც და ამერიკასაც ჩვენი ქვეყნისთვის იმდენი აქვს გაკეთებული, თუნდაც პოლიტიკურად და ასევე სხვა კუთხით, ასე მარტივად არ დაუშვებენ აქ სიტუაციის არევას და ხელიდან გაშვებას. ევროკავშირი ყველაფერს გააკეთებს იმისთვის, რომ კრიზისი დაიძლიოს. ევროკავშირმა რახან დაიწყო, ის არ ჩაიქნევს ხელს “, - განაცხადა იოსელიანმა.

ამასთან, იოსელიანმა აღნიშნა, რომ მოლაპარაკების მაგიდასთან ნიკა მელია უნდა იჯდეს. მისივე თქმით, მელიას გამოშვების მექანიზმი არსებობს და ხელისუფლებას ეს რომ უნდოდეს, გააკეთებდა.

„მე ვემხრობი იმ იდეას, რომელიც გულისხმობს დიდ შერიგებას იმ თვალსაზრისით, რომ მოხდეს ამნისტია 20 ივნისს დაკავებული ყველა ადამიანის, ერთი მხრიდანაც და მეორე მხრიდანაც და ეს იყოს მოტივატორი სხვა საკითხებზე დაიწყოს მსჯელობა. მესმის, რომ ამ მოლაპარაკების მეორე მხარეს ნიკა მელია უნდა იჯდეს და მისი გამოშვება არის შესაძლებელი და ამისთვის არსებობს შესაბამისი მექანიზმები და ხელისუფლებას ეს, რომ უნდოდეს გააკეთებდა“ , - განაცხადა იოსელიანმა.

ამასთან, იოსელიანი ყოფილი პრემიერის, გიორგი გახარიას განცხადებას, რომ ის პოლიტიკაში ბრუნდება, გამოეხმაურა და აღნიშნა, რომ „ეს არის ქართული პოლიტიკისთვის კარგი, როდესაც ახალი მოთამაშე შემოდის და აქვს მხარდაჭერა, იმიტომ, რომ ეს გააჯანსაღებს ქართულ პოლიტიკურ სივრცეს“.

„როდესაც გახარია გადადგა და ამის შესახებ მისი სურათის ქვეშ რამდენიმე ათასეული რეაქცია იყო, მაშინ ბევრმა გამოთქვა მოსაზრება, რომ ამას მხარდაჭერა მოჰყვებოდა და მოსალოდნელი იყო, რომ ის პოლიტიკაში დაბრუნდებოდა. მე ვთქვი, რომ ეს არის ქართული პოლიტიკისთვის კარგი, როდესაც ახალი მოთამაშე შემოდის და აქვს მხარდაჭერა, იმიტომ, რომ ეს გააჯანსაღებს ქართულ პოლიტიკურ სივრცეს, რაც მთავარია გადალაგდება პოლიტიკური პარტიების დღის წესრიგი და ზოგადად გადალაგდება პოლიტიკური ლანდშაფტიც, რადგან ახალი მოთამაშე აჩენს ახალ შესაძლებლობებს“, - განაცხადა იოსელიანმა.

იხილეთ ვიდეო

ტოომას ჰენდრიკ ილვესი - არ გჭირდებათ ევროკავშირის დროშების ყველგან აღმართვა, თუ მის ღირებულებებს არ იზიარებთ - სიტყვების თქმით: ”ჩვენ ევროპელები ვართ“, ევროკავშირში ავტომატურად ვერ შეხვალთ
ქართული პრესის მიმოხილვა 09.04.2021
ლევან დოლიძე - რაც უფრო დიდხანს გაგრძელდება ვაშინგტონსა და ბრიუსელში ჩვენს შიდა პრობლემებზე მსჯელობა, მით უფრო გაგვიჭირდება მათთან იმ საკითხებზე საუბარი, რასაც ქვეყნის ინტერესები მოითხოვს
ბექა ნაცვლიშვილი - როგორც ჩანს, "ქართული ოცნება“ ემზადება მოლაპარაკების მესამე რაუნდისთვის და აგრძელებს კომუნიკაციას ევროკავშირთან, ამის შედეგი კი იქნება ის, თუ რა მოხდება მელიას გადადებულ სასამართლოზე
კახა ოქრიაშვილი - 15 მაისის აქციის სამზადისში აქტიურად ვარ ჩართული
ხარისხი გარანტირებულია: "კარფური" „მასტერშეფის“ ახალი სეზონის გენერალური სპონსორი და მხარდამჭერი გახდა