საქართველოში ევროკავშირის წარმომადგენლობის ოფისში, პარტია „ევროპელი სოციალისტების“ ერთ-ერთმა ლიდერმა, პარლამენტის საგარეო ურთიერთობების კომიტეტის თავმჯდომარის მოადგილემ დავით ზილფიმიანმა ევროპული საბჭოს პრეზიდენტის, შარლ მიშელის მიერ შემუშავებულ შეთანხმების დოკუმენტს ხელი მოაწერა.
„ყოველთვის სრულად ვეთანხმებოდი ჩვენი მეგობრების, ევროპელი და ამერიკელი ფასილიტატორების მოწადინებას, ამიტომ ჩემი აქ მოსვლა განპირობებული პირადად ჩემი სურვილით. ეს არის ინდივიდუალური გადაწყვეტილება, თუმცა გეტყვით იმასაც, რომ გამომდინარე იქიდან, რომ ეს არ არის სასესიო კვირა, ამ წუთში მზადყოფნა გამოთქვა ბატონმა მიქაძემაც, ის ხელმოსაწერად ხვალ მოვა. დანარჩენებიც შევხვდებით და გავივლით ამ თემას“, - განაცხადა ზილფიმიანმა.
ცნობისთვის, საქართველოში ევროკავშირის წარმომადგენლობის ოფისი პარლამენტის ყველა არჩეული წევრისთვის ღიაა, რომელსაც შეთანხმების დოკუმენტზე ხელი ჯერ კიდევ არ მოუწერია.
შეგახსენებთ, რომ შარლ მიშელის დოკუმენტზე - „საქართველოს წინსვლის გზა“ ხელისუფლებასა და ოპოზიური პარტიების ნაწილს შორის შეთანხმება შედგა. დოკუმენტს ხელი ორბელიანების სასახლეში მოეწერა.