საბა ბუაძე შალვა პაპუაშვილის განცხადებაზე - ნაცვლად იმისა, რომ გაიზიარონ „ლელოს“ გულწრფელი სულისკვეთება და სიტუაციის განმუხტვის შეთავაზებული ვარიანტები განიხილონ, გვესმის უსაგნო და დესტრუქციული განცხადებები

ნაცვლად იმისა, რომ გაიზიარონ „ლელოს“ გულწრფელი სულისკვეთება და სიტუაციის განმუხტვის შეთავაზებული ვარიანტები განიხილონ, გვესმის უსაგნო და დესტრუქციული განცხადებები, - ამის შესახებ „ლელოს“ ერთ-ერთი ლიდერი, საბა ბუაძე სოციალურ ქსელ „ფეისბუქში“ წერს, რითაც ეხმაურება „ქართული ოცნების“ წევრის, შალვა პაპუაშვილის განცხადებას, სადაც პაპუაშვილი აცხადებს, რომ „ლელოს“ წევრები საკუთარ ხელმოწერას „ქარაფშუტულად ეპყრობიან“.

როგორც ბუაძე აღნიშნავს, შეთანხმების ხელმოწერიდან მესამე დღეს, მისი პათოსის სრულიად საპირისპირო განცხადებებს ვისმენთ „ქართული ოცნებისგან“, რაც ადასტურებს ამ პროცესში ხელისუფლების დესტრუქციულ განწყობას, რომლის მიზანიც არის ხელი შეუშალოს მიშელის 5 - პუნქტიანი შეთანხმების განხორციელებას.

„დიდი ალბათობით, ვერც ეს პაპუაშვილი მოუტანს ვერაფერს კარგს საქართველოს პარლამენტს.

ნაცვლად იმისა, რომ გაიზიარონ „ლელოს“ გულწრფელი სულისკვეთება და სიტუაციის განმუხტვის შეთავაზებული ვარიანტები განიხილონ, გვესმის უსაგნო და დესტრუქციული განცხადებები.

ბატონ პაპუაშვილს ვურჩევდი, სხვისი რეიტინგის დათვლის და სიცრუის გავრცელების ნაცვლად, კარგად დათვალოს ის ეკონომიკური ზიანი, რომელიც მისმა თანაპარტიელებმა და მათმა გარემოცვამ არაპროფესიონალიზმით, კორუფციით და უცოდინრობით სახელმწიფოს მიაყენეს.

მიუხედავად იმისა, რომ „ქართული ოცნებისგან“ კარგის მოლოდინი არასდროს გვქონია, სწორედ ასეთი ადამიანების შებოჭვის და შეთანხმების კონტროლის მიზნით მოვახერხეთ ევროპარლამენტარებისგან დაკომპლექტებული მონიტორინგის ჯგუფის შექმნაზე შეჯერება“, - აღნიშნა საბა ბუაძემ.