სულ რომ ხუთი ვარიანტი დარეგისტრირდეს, ხუთივეში იქნება ჩანაწერი, რომ კონვენციით დაცულ მუხლებზე ამნისტია არ გავრცელდეს, - ამის შესახებ ჟურნალისტებს მმართველ გუნდთან შეხვედრის დაწყებამდე „სტრატეგია აღმაშენებლის“ ლიდერმა გიორგი ვაშაძემ განუცხადა.

მისივე თქმით, „ქართული ოცნებაც“ თანახმაა, რომ კონვენციით დაცულ მუხლებს ამნისტია არ შეეხოს.

„ახლა დავიწყებთ სამუშაო შეხვედრას ყველაზე მნიშვნელოვან პრინციპულ საკითხზე, რომ კონვენციით დაცულ მუხლებზე ანუ ჯალათებზე არ გავრცელდეს ამნისტია. ჩვენ ჩვენი ვერსია კანონპროექტის, რა თქმა უნდა, გვაქვს, მათ აქვთ თავისი, იმიტომ ვხვდებით, რომ ეს ვერსიები ერთმანეთს დავაახლოვოთ, თუ ამის შესაძლებლობა არის. გარანტირებულად შემიძლია ვთქვა, რომ კონვენციით დაცული მუხლები, რომელზეც არ უნდა გავრცელდეს ამნისტიის კანონი, „ქართული ოცნებაც“ ამბობს, რომ არ უნდა გავრცელდეს. თვალი ვინც დათხარა, ჩემი აზრით არის კონვენციური დანაშაული, ვინც დათვის ტყვიების გამოყენებაზე გასცა დავალება, ეს არის კონვენციური დანაშაული, ამაზე არ გავრცელდება ამნისტიის კანონი, სულ რომ ხუთი ვარიანტი დარეგისტრირდეს, ხუთივეში იქნება ეს ჩანაწერი“, - განაცხადა ვაშაძემ.