არანაირი აუცილებლობა ამ ცვლილებების შემოტანის, მითუმეტეს დაჩქარებული წესით, არ არსებობდა და სრულიად ვიზიარებ აშშ-ის საელჩოს პოზიციას, - ამის შესახებ „მოქალაქეების“ ერთ-ერთმა ლიდერმა ლევან იოსელიანმა ჟურნალისტებთან ადმინისტრაციულ სამართალდარღვევათა კოდექსში ცვლილებებთან დაკავშირებით განაცხადა.

მისი თქმით, ამ საკითხზე მოქალაქეებს ძალიან ნათელი პოზიცია ჰქონდათ.

„მხოლოდ ორი ხმა დაფიქსირდა დარბაზში საწინააღმდეგო და ეს ორი ხმა გვეკუთვნოდა მე და ალეკო ელისაშვილს. არანაირი აუცილებლობა ამ ცვლილებების შემოტანის, მითუმეტეს დაჩქარებული წესით, არ არსებობდა და სრულიად ვიზიარებ აშშ-ის საელჩოს პოზიციას, რომ არ უწყობს მიღებული ცვლილებები ხელს იმ პროცესს, რაც საქართველოში მიდის, ვგულისხმობ, ოპოზიციას და ხელისუფლებას შორის პოზიციების დაახლოებას და შარლ მიშელის დოკუმენტის ფარგლებში ერთობლივი რეფორმების გატარების შესაძლებლობას,“ - განაცხადა იოსელიანმა.

როგორც იოსელიანი აღნიშნავს, როცა იურიდიულ კომიტეტში 48 საათამდე პატიმრობის ვადის გაზრდასთან დაკავშირებით დავა მიმდინარეობდა, მან იურიდიული კომიტეტი დაარწმუნა, რომ ეს გონივრული გადაწყვეტილება არ იყო.

„მივაღწიე იმას, რომ ანრი ოხანაშვილი, იურიდიული კომიტეტი დავითანხმე, რომ ეს არ იყო გონივრული გადაწყვეტილება და შევთანხმდით 24 საათზე. ამ 24 საათს დავუჭირე მე მხარი, რაც შეეხება დანარჩენს, ჯარიმების გაზრდას, საპატიმრო ვადის ქვედა ზღვარის გაზრდას, რა თქმა უნდა, ამის წინააღმდეგი ვიყავი,“ - განაცხადა იოსელიანმა.

კითხვაზე - არის თუ არა მიღებული ცვლილებები დაკავშირებული საპროტესტო აქციებთან, იოსელიანი აღნიშნავს, რომ „საჯარიმო სანქციები შეიძლება მიაჩნიათ ეფექტურ საშუალებად იმისთვის, რომ სამოქალაქო აქტივისტების მიმართ იქნას გამოყენებული უფრო ეფექტურად და ამიტომ მოხდა ამის გაზდა, თორემ პატიმრობის გამოყენება სამოქალაქო აქტივისტების მიმართ აქამდე არ მომხდარა“.