გიორგი სიორიძე - ვენეციის კომისიისა და ეუთო/ოდირის მოსაზრება საარჩევნო რეფორმასთან დაკავშირებით კვლავ მტკივნეული იქნება „ქართული ოცნებისთვის“

როგორც მოსალოდნელი იყო, ვენეციის კომისიისა და ეუთო/ოდირის მოსაზრება საარჩევნო რეფორმასთან დაკავშირებით კვლავ მტკივნეული იქნება „ქართული ოცნებისთვის“, - ამის შესახებ „ლელოს“ წევრმა გიორგი სიორიძემ განაცხადა. მისივე თქმით, მართალია, რეფორმის პროექტი ნაწილობრივ ეყრდნობა ოპოზიციასა და ხელისუფლებას შორის თვეების განმავლობაში, რამდენიმე რაუნდის მოლაპარაკებათა ნაყოფს და ეს პოზიტიური ცვლილებები ასახულია კანონპროექტში, თუმცა ერთპარტიულ პარლამენტში დარჩენილმა „ქართულმა ოცნებამ“ ჩვეულებისამებრ სათავისოდ გამოიყენა რეფორმის პროექტი და მასში ოპონენტების სადამსჯელო ელემენტებიც ჩააქსოვა.

„ეს ვენეციის კომისიისა და ეუთო/ოდირის ყურადღების მიღმა ვერ დარჩებოდა და საკმაოდ მწვავედაც იქნა შეფასებული. „ლელომ“ თავისი ხედვები გაუზიარა ევროპელ ექსპერტებს და ეს აისახა კიდეც მათ დასკვნაში. საარჩევნო ადმინისტრაციის დაკომპლექტებასთან მიმართებაში, ევროპელი ექსპერტები პირდაპირ მიუთითებენ ცესკოს თავმჯდომარის ე.წ. „პროფესიული წევრების“ ლეგიტიმაციისთვის სტაბილურად კვალიფიციური უმრავლესობის და/ან „ორმაგი უმრავლესობის“ მექანიზმის შემოღებას, რომლის მიხედვითაც პარლამენტში კანდიდატის არჩევისთვის როგორც უმრავლესობის, ასევე ოპოზიციის წევრთა უმრავლესობის მხარდაჭერაა აუცილებელი. ამასთან, ნეგატიურადაა შეფასებული არსებულ პოლიტიკურ მოცემულობაში საუბნო საარჩევნო კომისიის შემადგენლობაში პარტიული მდგენელის გაუქმებაც. სადამსჯელო მექანიზმადაა შეფასებული ბოიკოტში მყოფი პარტიებისთვის კომისიის წევრთა დანიშვნის უფლების ჩამორთმევა ( გასათვალისწინებელია, რომ კანონპროექტი მაშინაა შემუშავებული, როდესაც პრაქტიკულად სრული ოპოზიცია ბოიკოტის რეჟიმში იმყოფებოდა). ძალიან მნიშვნელოვანია, რომ ვენეციის კომისია და ეუთო/ოდირი აღიარებს ქართული არჩევნების მთავარ პრობლემებს, მათ შორის ე.წ. „საარჩევნო კარუსელებს“ და ამიტომაც აუცილებლად მიიჩნევს თანამედროვე ტექნოლოგიების არჩევნების პროცესში სასწრაფო დანერგვას, რაც მინიმუმამდე დაიყვანს ამ რისკებს. ბოლოს კი, უნდა ითქვას, რომ შარლ მიშელის დოკუმენტი ითვალისწინებს რამდენიმე მიმართულებას, რომლის განხორციელების ვალდებულებაც იკისრეს ხელმომწერმა მხარეებმა და ახლა, როდესაც ოპოზიცია უკვე გაჩნდა პარლამენტში, მიმდინარე საარჩევნო რეფორმა უფრო მეტად გახდება ვენეციის კომისიისა და ეუთო/ოდირის რეკომენდაციების შესაბამისი“, - აცხადებს სიორიძე.

ხათუნა ბურკაძე - კრემლის აგრესიული პოლიტიკის ფონზე აუცილებელია აშშ-საქართველოს სტრატეგიული პარტნიორობის ქარტიის განახლება
ქართული პრესის მიმოხილვა 06.12.2021
პაატა დავითაია - საკონსტიტუციო ცვლილებებთან დაკავშირებით „ქართული ოცნების“ და „ნაციონალური მოძრაობის“ ინტერესები ემთხვევა - ბარიერის დაწევა აუცილებელია ქართული დემოკრატიის განვითარებისთვის
Colliers MMS გაფართოებული საინვესტიციო პორტფელი და ახალი შეთავაზება სამშენებლო სექტორს
სამშენებლო კომპანია „მეგა ჰოლდინგი“ მეგა საახალწლო აქციას აანონსებს: ყველა ბინა საჩუქრით
შეიძინე ბინა წინასწარი შენატანის გარეშე - შეთავაზება „ტერასა გლდანი გრინ თაუერისგან“