თბილისის საქალაქო სასამართლოში ნიკა მელიას პროცესი მიმდინარეობს
თბილისის საქალაქო სასამართლოში „ერთიანი ნაციონალური მოძრაობის" თავმჯდომარის, ნიკა მელიას პროცესი მიმდინარეობს. სხდომას არ ესწრება თავად ბრალდებული.
დღევანდელ სასამართლო პროცესზე დაცვის მხარემ შესავალი სიტყვა უნდა წარმოთქვას.
ნიკა მელიას ადვოკატის, გიორგი კონდახიშვილის განცხადებით, აღნიშნულ პროცესს სამართალთან კავშირი არ აქვს.
„გრძელდება პოლიტიკური მართლმსაჯულების პროცესი ნიკა მელიასთან მიმართებით. ერთი ეტაპი დასრულდა, რასაც პოლიტიკური პატიმრობა ერქვა და ნიკა მელია გათავისუფლდა, ხელისუფლება იძულებული გახდა, რომ ნიკა მელია პოლიტიკური ტყვეობიდან გაეთავისუფლებინა. დღეს რუტინულად გრძელდება ეს პროცესი, ამ პროცესს ე.წ. იმიტირებულ სასამართლო პროცესს ვუწოდებ, სადაც კანონის და სამართლის მოთხოვნიდან არაფერი ხდება, ყველაფერი პოლიტიკური მართლწესრიგით მიმდინარეობს. იურისტებს ვალდებულება გვაქვს, დავიცვათ კანონის მოთხოვნები, გავაგრძელოთ პროცესში მონაწილეობა და ყველაფერი გავაკეთოთ, რომ ნიკა მელიას უდანაშაულობა დავამტკიცოთ. ისედაც ცხადია, რომ ბრალდების შინაარსიც და ეს საქმეც თავიდან ბოლომდე პოლიტიკურად მოტივირებულია და მოგონილია ერთადერთი მიზნით, რომ ნიკა მელიას განეიტრალება მომხდარიყო პოლიტიკური პროცესებიდან",- განაცხადა კონდახიშვილმა.
v-if="article.gallery" v-html="article.gallery"
