თბილისის საქალაქო სასამართლოში „რუსთავი 2“-ის დამფუძნებლების დავით დვალისა და ჯარჯი აქიმიძის სასამართლო პროცესი იმართება.
ისინი ტელეკომპანიის ამჟამინდელი მფლობელის, ქიბარ ხალვაშისგან 60%-იან წილს ითხოვენ. დღევანდელ პროცესზე მოპასუხე მხარეს იმყოფება ტელეკომპანიის გენერალური დირექტორი პაატა სალია.
დავით დვალისა და ჯარჯი აქიძიმის ადვოკატის, კახა კოჟორიძის განცხადებით, დღევანდელ პროცესზე შუამდგომლობის სახით დამატებით დოკუმენტაციას წარადგენენ, რომლითაც დასტურდება, რომ 2004 წელს მაშინდელი ხელისუფლების მხრიდან ხორციელდებოდა ,,სისტემატური, მიზანმიმართული იძულება „რუსთავი 2“-ის დამფუძნებლებზე, რათა მომხდარიყო მათი წილის, 60%-ის დათმობა”.
მისივე თქმით, არ შეიძლება ქიბარ ხალვაში რაიმე სამართლებრივი ლოგიკით ჩაითვალოს „რუსთავი 2“-ის წილების კეთილსინდისიერ შემძენად.
„დღეს „რუსთავი 2“-ის საქმეზე გაიმართება მორიგი სასამართლო პროცესი, მოსამზადებელი სხდომა, სადაც ვაპირებთ წარვადგინოთ დამატებითი საქმის მასალები. ეს არის საგამოძიებო ორგანოებისგან მიღებული ის დოკუმენტაცია, რომელიც პირდაპირ ადასტურებს, რომ 2004 წელს მაშინდელი ხელისუფლების მხრიდან ხორციელდებოდა სისტემატური, მიზანმიმართული იძულება „რუსთავი 2“-ის დამფუძნებლებზე, რათა მომხდარიყო მათი წილის, 60%-ის დათმობა. ამავე მტკიცებულებებით ცალსახაა, რომ არ შეიძლება ქიბარ ხალვაში რაიმე სამართლებრივი ლოგიკით ჩაითვალოს „რუსთავი 2“-ის წილების კეთილსინდისიერ შემძენად”, - აღნიშნა კახა კოჟორიძემ.