ჩემთვის ეს კვლევა ერთადერთ რაღაცას აღნიშნავს, რომ ის ბმა, რომელიც მქონდა ხალხთან, ძალაშია,- ამის შესახებ პარტია „ხალხისთვის“ ლიდერმა ანა დოლიძემ „პალიტრანიუსის“ გადაცემა „ნიუსრუმში“ IPSOS-ის და Edison Research-ის კვლევის შედეგების შეფასებისას განაცხადა.
მისი თქმით, მადლიერია იმ მხარდაჭერისთვის, რომელსაც ხალხი მის მიმართ გამოხატავს.
„თუ შევხედავთ ამ რეიტინგს, დიდი ფული, დიდი რესურსი და მე, იქეთ კი ყოფილი პრემიერი, მოქმედი პრემიერი და ბიძინა ივანიშვილი. ამ შემთხვევაში ჩემთვის ეს კვლევა ერთადერთ რაღაცას აღნიშნავს, რომ ის ბმა, რომელიც მქონდა ხალხთან, ეს ბმა ძალაშია. რაც შეეხება, პარტიულ რეიტინგს, ჩვენი პარტია არის ერთი კვირის. ეს ჩვენი პოლიტიკური საქმიანობის დასაწყისია“, - განაცხადა დოლიძემ.
წამყვანის კითხვაზე, დავუშვათ ოპოზიციამ თქვას, ანა დოლიძეს ვასახელებთ საერთო კანდიდატად და მხარს ვუჭერთ, ასეთ დროს რამდენად რეალურია გამარჯვების შანსი, დოლიძე პასუხობს, რომ მისი მხარდაჭერის შემთხვევაში ისინი მხარს დაუჭერენ „ძალას და ადამიანს, რომელიც არის ნამდვილად დამოუკიდებელი“.
„ოპოზიციურმა პარტიებმა ცალ-ცალკე განაცხადეს, რომ ისინი ფიქრობენ კანდიდატზე, მათ შორის საერთო კანდიდატზე. ვფიქრობ, რომ ამ კვლევის შემდეგ კარგად ჩანს, რომ ჩემი მხარდაჭერის შემთხვევაში ისინი მხარს დაუჭერენ ძალას და ადამიანს, რომელიც არის ნამდვილად დამოუკიდებელი და ნამდვილად შუაში“, - განაცხადა დოლიძემ.