გიორგი კაკაურიძე რომან გოცირიძეს - დამატებული თანხების 50%-ზე მეტი ჯანდაცვის მიმართულებით იხარჯება, რომელ საარჩევნო პროგრამებზე საუბრობთ?

დამატებული თანხების 50%-ზე მეტი ჯანდაცვის მიმართულებით იხარჯება, რომელ საარჩევნო პროგრამებზე საუბრობთ, - ამის შესახებ ფინანსთა მინისტრის მოადგილემ გიორგი კაკაურიძემ დღეს საფინანსო-საბიუჯეტო კომიტეტის სხდომაზე 2021 წლის ბიუჯეტში ცვლილებების პროექტის განხილვისას დეპუტატ რომან გოცირიძის დასმულ კითხვაზე საპასუხოდ განაცხადა.

მისი განცხადებით, გასული წლის ბოლოს, ბიუჯეტის მიღების დროს, ძალიან ძნელი იყო ამგვარი ხარჯების წინასწარ განსაზღვრა.

„ბატონმა რომანმა თავის გამოსვლაში თქვა: „შეინახეთ ფული და საარჩევნოდ ახლა გეგმავთ დახარჯვასო“. დამეთანხმებით, გაცილებით მარტივი იქნებოდა ეს ფული წინასწარ გვცოდნოდა და მაშინ თავიდანვე ჩავდებთ საარჩევნო პროგრამებში... სწორედ იმიტომ, რომ რესურსი არ ვიცოდით და ძალიან ძნელი იყო ასეთი ხარკების განსაზღვრა წინასწარ, ვერ ხერხდებოდა ბიუჯეტში ამ რესურსების დაგეგმვა. ეს რესურსები არა საარჩევნო პროგრამებზე მიდის, არამედ დამატებითი თანხების 50%-ზე მეტს მხოლოდ ჯანდაცვის მიმართულებით ვხარჯავთ“, - განაცხადა ფინანსთა მინისტრის მოადგილემ.

მან ასევე ისაუბრა პრივატიზაციიდან დამატებით მისაღებ 200 მლნ ლარზე.

„დაისვა კითხვა - რატომ არ ვიცოდით, რომ პრივატიზაციიდან მისაღებ შემოსავალს დამატებით 200 მლნ ლარით გაზრდიდითო. ხომ აბსურდია, გასული წლის ნოემბერში გვესაუბრა პრივატიზაციის ასეთ გეგმაზე? შევხედოთ 2018 და 2019 წლებს. 200 მლნ ლარის ფარგლებში იყო პრივატიზაცია მუდამ. წელს ვიძახით რომ 480 მლნ ლარის პრივატიზაცია უნდა გვქონდეს და თქვენ გვეუბნებით - როგორ არ იცოდით ეს წინასწარო. ჯერ კიდევ წლის პირველ კვარტალში გამოტანილი აუქციონები იშლებოდა, იმიტომ, რომ გაურკვევლობა იყო ეკონომიკაში. ასეთ დროს არავინ არ დებს ფულს აქტივების შეძენაში, პირიქით, ყველა ცდილობს რისკიანი აქტივები მოიშოროს. ბატონ რომანს თუ შეუძლია ამაზე მეტი პრივატიზაცია განახორციელოს და 500 მლნ ლარის კი არა მილიარდის პრივატიზაცია გააკეთოს, ყველას გაგვიხარდება, მაგრამ ეს ასე არ არის. ეს გეგმა არის ძალიან ამბიციური, არ არის მარტივი შესასრულებელი, მაგრამ დარწმუნებული ვარ, ეკონომიკის სამინისტრო და ქონების მართვის სააგენტო ყველაფერს გააკეთებენ რომ ეს გაზრდილი მაჩვენებლები შესრულდეს“, - აღნიშნა გიორგი კაკაურიძემ.

ასევე კაკაურიძემ განმარტა სს „სახელმწიფო ელექტროსისტემის“ დივიდენდის საკითხი.

„სახელმწიფო ელექტროსისტემის შემთხვევაში სესხის დაფარვა, რაც გრაფიკითაა გაწერილი, რა თქმა უნდა, გაწერილი იყო ბიუჯეტში, მაგრამ ის, რომ კომპანია წინმსწრებით დაფარავდა ვალდებულებებს არ გვქონდა გათვალისწინებული და ის, რომ საწარმოს წინმსწრებით შეუძლია თანხის დაფარვა მეტყველებს ამ კომპანიის გაჯანსაღებაზე, რადგან მას შეუძლია თანხების მოზიდვა და სახელმწიფოს წინაშე არსებული ვალდებულებების წინმსწრებად დაფარვა“, - განაცხადა გიორგი კაკაურიძემ.

ოთარ ჯანელიძე - რუსეთიდან შემომსვლელ მიგრანტებთან დაკავშირებით უნდა იგრძნობოდეს, რომ ვმოქმედებთ, როგორც სახელმწიფო
ქართული პრესის მიმოხილვა 26.09.2022
დიტერ ბოდენი - ქართულ-აფხაზური ურთიერთობების მოწესრიგების პროცესში საქართველო უნდა იყოს ლიდერი, სამწუხაროდ, ამ ეტაპზე ქართული მხრიდან ამას ვერ ვხედავ
სვისმედკომერსი - უმტკივენულო ანესთეზიის ტექნოლოგიის დანერგვა საქართველოს ბაზარზე
ლისის ტბაზე LISI VIBES გაიმართება
ლიბერთიმ მეთხილე ფერმერებისთვის ახალი აგროპროექტი დაიწყო
განახლებული ვაკის საცურაო აუზი ახალ სეზონს მასპინძლობს
ლიბერთის ახალი აქცია სამომხმარებლო სესხზე