ცესკო ადგილობრივი არჩევნებისთვის ადმინისტრაციული რესურსების გამოყენების შესახებ ურთიერთშეთანხმების მემორანდუმთან დაკავშირებით ინფორმაციას ავრცელებს

ცენტრალურ საარჩევნო კომისიას (ცესკო), თავისუფალი და სამართლიანი არჩევნებისთვის უწყებათაშორის კომისიას და 18 ადგილობრივ არასამთავრობო ორგანიზაციას შორის ურთიერთშეთანხმების მემორანდუმი გაფორმდა. ინფორმაციას ცენტრალური საარჩევნო კომისია ავრცელებს.

„ჩვენ საერთაშორისო პარტნიორთან, საარჩევნო სისტემების საერთაშორისო ფონდთან (IFES) თანამშრომლობით იქმნება გარკვეული პლატფორმა, სადაც ჩვენ არასამთავრობო ორგანიზაციებთან ერთად გვაქვს შესაძლებლობა, რომ ვიმსჯელოთ და შევთანხმდეთ გარკვეულ საკითხებზე, რომელიც კითხვის ნიშნებს მოხსნის ადმინისტრაციული რესურსების გამოყენებასთან მიმართებაში. აქედან გამომდინარე, ვფიქრობ, რომ დღევანდელი დღე და ადმინისტრაციული რესურსების გამოყენების შესახებ მემორანდუმზე ხელმოწერა არის უპირობოდ მნიშვნელოვანი“, - განაცხადა ცესკო-ს თავმჯდომარემ გიორგი კალანდარიშვილმა ღონისძიების დასრულების შემდეგ.

თავისუფალი და სამართლიანი არჩევნებისათვის უწყებათაშორისი კომისიის სახელით დოკუმენტს ხელი იუსტიციის მინისტრის მოადგილე, თორნიკე ჭეიშვილმა მოაწერა.

როგორც მან განაცხადა, აღნიშნული მემორანდუმის გაფორმება ძალიან მნიშვნელოვანი ტრადიციაა, რომელიც არჩევნების სამართლიან და თავისუფალ გარემოში ჩატარებას ემსახურება.

„დღეს ხელი მოეწერა მემორანდუმს, რომელიც მიზნად ისახავს საარჩევნო კანონმდებლობით გათვალისწინებული ნორმების ერთგვარ განმარტებას. ვფიქრობ, რომ ეს არის ძალიან მნიშვნელოვანი ტრადიცია, რომელიც წლების განმავლობაში არასამთავრობო ორგანიზაციების, ცენტრალური საარჩევნო კომისიისა და უწყებათაშორისი კომისიის მიერ დამკვიდრდა და ემსახურება იმას, რომ არჩევნები ჩატარდეს სამართლიან და თავისუფალ გარემოში. რაც მთავარია ემსახურება იმასაც, რომ მხარეებს ჰქონდეთ წინასწარ ზუსტი ინფორმაცია, თუ როგორ უნდა მოხდეს ამა თუ იმ საკანონმდებლო ჩანაწერის განმარტება“, - განაცხადა თორნიკე ჭეიშვილმა.

ცესკო-ს ცნობით, მემორანდუმზე ხელმოწერა და ამით მის პრინციპებთან მიერთება შეუძლია არასამთავრობო სექტორის და პოლიტიკური პარტიების იმ წარმომადგენლებს, ვინც იზიარებს მემორანდუმის მუხლებში მითითებულ განმარტებებს.

ურთიერთშეთანხმების მემორანდუმი საარჩევნო ადმინისტრაციამ საარჩევნო სისტემების საერთაშორისო ფონდთან (IFES) თანამშრომლობით შეიმუშავა. IFES-ი მსგავსი მემორანდუმის გაფორმებას ბოლო რამდენიმე საერთო არჩევნებზე უწევს ფასილიტაციას, რაც საარჩევნო პროცესში ჩართული მხარეებისთვის თანაბარი პირობების უზრუნველყოფას ისახავს მიზნად.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს