როგორც ჩანს, "ქართულ ოცნებას" არ სჭირდება სტრატეგიული პარტნიორები, - ამის შესახებ "სტრატეგია აღმაშენებლის" წევრმა სერგო ჩიხლაძემ განაცხადა, რითაც უპასუხა "ინტერპრესნიუსის" კითხვას "ქართული ოცნების" ლიდერების მიერ სტრატეგიული პარტნიორების მისამართით გაკეთებული განცხადებების შესახებ.

როგორც ჩიხლაძემ განცხადა, "ქართული ოცნება" საკუთარი განცხადებებითა და ქმედებებით საქართველოს დასავლელ პარტნიორებთან აშორებს და ტოტალიტარიზმთან აახლოვებს.

"როგორც ჩანს, „ქართულ ოცნებას" არ სჭირდება სტრატეგიული პარტნიორები, საქართველოს სჭირდება, რომ გვყავდეს სტრატეგიული პარტნიორები და პარტნიორობა კიდევ უფრო გაღრმავდეს. სამწუხაროდ, "ქართული ოცნება" არის ის ძალა, რომელიც გვაშორებს ჩვენს დასავლელ პარტნიორებს და მიგვაქანებს ავტორიტარიზმისა და ტოტალიტარიზმისკენ. ესაა "ქართული ოცნება".

ჩვენ რამდენიმე წლის წინ ვერც წარმოვიდგენდით, რომ თუნდაც ვერბალურად ასეთი რამ ეთქვათ ჩვენს დასავლელ პარტნიორებზე ან ევროკავშირის ელჩებზე. მაგრამ დღეს ვხედავთ, რომ ისინი უკვე ქმედებითაც და ვერბალურადაც ახორციელებენ დარტყმას, გალაშქრებას ჩვენს დასავლელ პარტნიორებზე, ჩვენს დასავლურ ინტერესებზე, რითაც გვაშორებენ დასავლეთს და გვაახლოებენ ტოტალიტალურ ქვეყნებს",- განაცხადა ჩიხლაძემ.