სააკაშვილს ჰგონია, რომ ქართული სახელმწიფოს დამფუძნებელია და საქართველოში მას აღიქვამენ უფრო მაღალი დონის შემოქმედად, ვიდრე მაგალითად, დავით აღმაშენებელს და ვახტანგ გორგასალს,- ამის შესახებ ჟურნალისტებთან ადამიანის უფლებათა კომიტეტის თავმჯდომარე მიხეილ სარჯველაძემ განაცხადა.
როგორც მან აღნიშნა, სააკაშვილი ელოდება გარკვეული მოცემულობის შექმნას, თუმცა, მის ჩამოსვლას იმ პირობებში, როცა ყოველი მეორე ადამიანი ხმას "ქართულ ოცნებას" აძლევს, პერსპექტივა არ გააჩნია.
"მიხეილ სააკაშვილი აცდენილია მოვლენებს, მას კვლავ აქვს განცდა, რომ ქართული სახელმწიფოს დამფუძნებელია. ეს გამაღიზიანებელი ფრაზა ადრეც ისმოდა, ახლაც მკაფიოდ განაცხადა. ჰგონია, რომ საქართველოში მას აღიქვამენ უფრო მაღალი დონის შემოქმედად, ვიდრე მაგალითად, დავით აღმაშენებელს, ვახტან გორგასალს და ა.შ. დაკარგულია რეალობის აღქმა. ის შეიძლება ვარაუდობს, აქედან წასული არასწორი აქვს ინფორმაცია, რომ "ნაციონალურ მოძრაობას" ენდობა მოსახლეობის უდიდესი უმრავლესობა. ამ მცდარ მოცემულობას აკვირდება ის და თუ ექნება მოცემულობა, რომ რაღაცნაირად მოვიდეს ხელისუფლებაში, ის გადადგამს ამ ნაბიჯს და ჩამოვა, თუმცა, ამის წინაპირობა ობიექტურად არ არსებობს. როცა ჩვენი პოზიცია ასეთია, რომ პრაქტიკულად ყოველი ამომრჩეველი ხმას აძლევს "ქართულ ოცნებას", არავითარი პერსპექტივა ამ კაცის ჩამოსვლას არ აქვს, ქართულ პოლიტიკაზე ეს ვერ იქონიებს გავლენას,"- განაცხადა სარჯველაძემ.