თბილისის საქალაქო სასამართლოში ისნის საოლქო საარჩევნო კომისიის მიერ მიღებული გადაწყვეტილების შესახებ საჩივრების განხილვა მიმდინარეობს.
პროცესს „ევროპული საქართველოს“ და საერთო ოპოზიციური მაჟორიტარობის კანდიდატი ისანში ბესიკ დონაძე ესწრება.
როგორც დონაძემ განაცხადა, სასამართლოს გადაწყვეტილება ერთგვარი ტესტი იქნება.
„გუშინ შევიტანეთ სარჩელი და ვასაჩივრებთ ისნის საოლქო საარჩევნო კომისიის მიერ მიღებულ გადაწყვეტილებას, რომელმაც არ დააკმაყოფილა ჩვენი საჩივარი, არ გახსნა უბნები და მხოლოდ და მხოლოდ ხელმოწერების გადათვლით „გააპრავა“ დარღვევები. ოქმი იყო დაუბალანსებელი და დაუბალანსებელი ოქმის ერთადერთი საშუალება სიმართლის დასადგენად ეს არის ის, რომ გაიხსნას სრულად საარჩევნო უბანი, გადაითვალოს ხელმოწერების რაოდენობა, სუბიექტების ანუ ბიულეტენების რაოდენობა და მხოლოდ ამის შემდეგ უნდა დააყენოს ახალი შედეგი საოლქო საარჩევნო კომისიამ, მაგრამ ოლქში „ქართულ ოცნებას“ უმრავლესობა აქვს, 12 ხმით გადაწყდა, რომ არ გახსნიდნენ არცერთ საარჩევნო უბანს, რადგან არ დამდგარიყო ის შედეგი, რა შედეგიც რეალურად უნდა დამდგარიყო.
სასამართლოს იმედი ჩვენ ნამდვილად არ გვაქვს, უბრალოდ, ეს იქნება ერთგვარი ტესტი მოიქცევა ისე, როგორც წინა წელს, როდესაც სხდომებზე 5 წუთში ყველა სარჩელს განუხილველს ტოვებდნენ თუ მოიქცევიან კანონიერად და განიხილავენ საკითხს, უარის შემთხვევაში კი ჩვენი საერთაშორისო პარტნიორები დაინახავენ თუ როგორ სინქრონულად აყალბებს ხელისუფლება არჩევნებს დაწყებული ცენტრალური საარჩევნო კომისიიდან, საოლქო საარჩევნო კომისიაში, შემდეგ საუბნო საარჩევნო კომისიაში, შემდგომში კი ბეჭედს უსვამს სასამართლო გაყალბებას და ამის ერთ-ერთი მაგალითი იქნება თუ რა გადაწყვეტილებას მიიღებს პირველი ინსტანცია, ჩვენ გავაგრძელებთ დავას მეორე ინსტანციაში“, - განაცხადა დონაძემ, რომლის კომენტარსაც „ევროპული საქართველოს“ პრესსამსახური ავრცელებს.