ჯანდაცვის კომიტეტი, თავისი კომპეტენციის ფარგლებში, დააკვირდება პროცესს. მთავარი მიზანია, რომ მოხდეს მუდმივი მონიტორინგი, რომ სააკაშვილის ჯანმრთელობის მდგომარეობა იყოს სტაბილური და ასევე, მისი უფლებრივი მდგომარეობა იყოს საპარლამენტო ზედამხედველობის ქვეშ, - ამის შესახებ საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე, დიმიტრი ხუნდაძემ მედიას იუსტიციის სამინისტროში მიხეილ სააკაშვილის ჯანმრთელობის მდგომარეობასთან დაკავშირებით გამართული შეხვედრის შემდეგ განუცხადა.
მისივე თქმით, სააკაშვილის უფლებების დაცვის კუთხით, პროცესს მონიტორინგს ჯანდაცვის კომიტეტი გაუწევს.
“ჩვენ დღეს გავიარეთ ტექნიკური საკითხები, შედგენილია უკვე დარგობრივი სპეციალისტების ჯგუფი, რომლის შემადგენლობაც წარედგინება მსჯავრდებულს, რომ იყოს მისი თანხმობა, რომ ისინი ჩაერთონ კლინიკური კვლევების პროცესში და განახორციელონ მონიტორინგი. ჯანდაცვის კომიტეტი კლინიკურ საკითხებში ვერ შევა, მაგრამ დააკვირდება პროცესს, რომ ყველა პროცედურა იყოს დაცული და საჭიროების შემთხვევაში, შესრულდეს ყველა გაცემული რეკომენდაცია. ჩვენი ჯგუფის მთავარი მიზანი არის, მსჯავრდებულის მდგომარეობა იყოს დაზღვეული, ასევე დაზღვეული იყოს მისი უფლებრივი მდგომარეობა და მთავარი, საზოგადოებას მიეწოდოს სწორი ინფორმაცია და არ დარჩეს სპეკულაციის სივრცე”, - განაცხადა ხუნდაძემ.