ნიკა მელიას არჩევნების მეორე ტურში გამარჯვების შანსი არა აქვს - პრაქტიკულად გამორიცხული მგონია, თუნდაც ათპროცენტიანი ჩამორჩენის აღმოფხვრის შესაძლებლობა, - ასეთ პროგნოზს პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძე აკეთებს.

სარჯველაძე ე.წ. ჩრდილოვანი კაბინეტის ფორმირების გეგმასაც სკეპტიკურად აფასებს.

„შესაძლებლობას ვერ დავუშვებ, რომ ნიკა მელიამ დედაქალაქის მერის არჩევნებში შეიძლება გაიმარჯვოს. მას შემდეგ, რაც ოპოზიციაში დარჩებიან, შეუძლიათ, იზრუნონ ჩრდილოვანი მოდელით მუშაობაზე, თუმცა ამ გეგმებთან მიმართებაში ცოტა სკეპტიკური ვიქნებოდი იმის გათვალისწინებით, რომ “ნაციონალური მოძრაობა” არის პოლიტიკური ძალა, რომელსაც ოპოზიციაში მყოფს გეგმა საერთოდ არ აქვს, რომ ქვეყნის საკეთილდღეოდ რაიმე გააკეთოს. ამის დასტურია თითქმის მათი ერთწლიანი საპარლამენტო გამოცდილება, რომლის განმავლობაშიც მათი მხრიდან მოსახლეობის პრობლემებით დაინტერესება და ამ თემებზე მუშაობა არ მინახავს. მათთვის ყოველთვის აქტუალურია ნებისმიერი სხვა, მათთვის მერკანტილურად საინტერესო საკითხები", - განაცხადა მიხეილ სარჯველაძემ.