ვადასტურებ, რომ საქართველოს შინაგან საქმეთა სამინისტრო ყველა მიმართულებით, ყველა ვერსიაზე მუშაობს,- ამის შესახებ ანასტასია შატალოვას მკვლელობის საქმის პროკურორმა თამარ იაკობიძემ ჟურნალისტებს განუცხადა, რითაც უპასუხა კითხვას, მუშაობს თუ არა გამოძიება შეკვეთილი მკვლელობის ვერსიაზე.

ამასთან, როგორც პროკურორი აღნიშნავს, ტერიტორიიდან, სადაც დანაშაული მოხდა, ვიდეო ჩანაწერები ამოღებულია, თუმცა განმარტავს, რომ იმ პირების ვინაობა, ვინც ჩანაწერზე ჩანს, ექსპერტიზის შემდეგ დადგინდება.

„ამ ეტაპზე საქმეზე ჩატარებული საგამოძიებო მოქმედებებით ამოღებულია როგორც კონკრეტულ ტერიტორიებზე ვიდეო-ჩანაწერები, დაკავებული პირების მიერ მოწოდებული ინფორმაცია, ასევე ფარული საგამოძიებო მოქმედებები, რაც დღეს სასამართლო პროცესზე იქნა წარდგენილი.

ტერიტორია, სადაც დანაშაული მოხდა, ვიდეო სათვალთვალო კამერებითაა აღჭურვილი და გიდასტურებთ, რომ გარკვეული კამერები ბრალდების მხარეს ამოღებული აქვს“,- განაცხადა თამარ იაკობიძემ.

რაც შეეხება მკვლელობის მოტივს, თამარ იაკობიძის განცხადებით, ამ საკითხზე გამოძიება მუშაობს. ხოლო კითხვაზე, ფიგურირებს თუ არა მკვლელობის საქმეში ქალი, იაკობიძე ამბობს, რომ „ამ ეტაპზე საქმეში კონკრეტული ქალი არ ფიგურირებს“.

რაც შეეხება მკვლელობის საქმეში არსებულ ნივთმტკიცებებს, პროკურორის ინფორმაციით, ამოღებულია ხელყუმბარები და ჩანთა, რომელშიც „დაზარალებულის პირადი ნივთებია მოთავსებული“.

„დანაშაულის იარაღი საქმეში არ დევს, მაგრამ გასროლილი მასრები ამოღებულია“,- განაცხადა თამარ იაკობიძემ.