ხელისუფლება იქცევა არაადეკვატურად, კონსილიუმის დასკვნაც და სახალხო დამცველის განცხადებაც მეტყველებს, რომ ციხის საავადმყოფო, რომელზეც აპელირებს ხელისუფლება, არ არის მრავალფუნქციური, - ამის შესახებ „ნაციონალური მოძრაობის“ აღმასრულებელმა მდივანმა კობა ნაყოფიამ რუსთავის მე-12 პენიტენციურ დაწესებულებაში მისვლის შემდეგ განაცხადა.

როგორც მან ჟურნალისტებთან საუბრისას აღნიშნა, ხელისუფლებას ეშინია მიხეილ სააკაშვილის და მიაჩნიათ, რომ ციხის საავადმყოფოში მათთვის ნაკლებად საშიშია.

„იქ არ არის შესაბამისი დანადგარები, რომელსაც საჭიროებს სააკაშვილის სტაციონარში მოთავსების სტანდარტები. სხვა ალტერნატივა არ არის, ის უნდა იყოს გადაყვანილი ისეთ კლინიკაში, სადაც მიიღებს შესაბამის სამედიცინო მომსახურებას. ხელისუფლებას ეშინია სააკაშვილის, მიაჩნია, რომ ციხის საავადმყოფოში მათთვის ნაკლებად საშიშია, მაგრამ „ქართული ოცნება“ პრაქტიკულად გაკოტრებულია, ხალხის ნდობა დაკარგული აქვთ და სააკაშვილი მალე იქნება თავისუფლებაზე. ამ ქმედებით ვერაფერს კარგ ვერ მიაღწევენ, მოვუწოდებ დროზე მოვიდნენ გონს და აღმოუჩინონ ის სამედიცინო დახმარება, როგორიც მას სჭირდება”, - აღნიშნა კობა ნაყოფიამ.