თავისუფლების მოედანზე შეკრებილი საპროტესტო აქციის მონაწილეები ამ წუთებში მსვლელობით მთავრობის ადმინისტრაციისკენ დაიძრნენ.

მთავრობის ადმინისტრაციასთან გადანაცვლებისკენ მათ „ნაციონალური მოძრაობის“ თავმჯდომარე, ნიკა მელიამ მოუწოდა.

როგორც მელიამ აღნიშნა, დღეიდან პრემიერ-მინისტრ ირაკლი ღარიბაშვილს „აღარ მიეცემა კანცელარიაში შესვლის და გამოსვლის საშუალება.

„ვისაც ჯანმრთელობა ხელს გიწყობთ, ყველა დავრჩეთ, ახლა სახლებში ყოფნის დრო არ არის. მეტიც, ვინც გვიყურებთ, ხვალ დილიდან შემოგვიერთდით, პარალელურად კანცელარიის შენობასთან დიდი, მძლავრი აქცია გაგრძელდება. თუ ბატონი ღარიბაშვილი შიგნითაა, ვერ გამოვა, თუ არ არის, ვერ შევა”, - აღნიშნა მელიამ.

ნიკა მელიას თქმით, ისინი არ დაიღლებიან.

„ყველამ დაინახოს, რომ ჩვენ არ ვიღლებით და არ დავიღლებით. გპირდებით სიცოცხლის უკანასკნელ ამოსუნთქვამდე, მე ან თქვენთან ერთად გამარჯვებული გავალ, ან სიცოცხლე არაფრად მიღირს“, - განაცხადა მელიამ.