Bloomberg - მსოფლიოს 184 ქვეყანაში კორონავირუსის საწინააღმდეგო ვაქცინების 7.43 მილიარდზე მეტი დოზა გამოიყენეს

მსოფლიოს 184 ქვეყანაში კორონავირუსის საწინააღმდეგო ვაქცინების 7.43 მილიარდზე მეტი დოზა გამოიყენეს. შესაბამის მონაცემებს მსოფლიოში ვაქცინაციის მიმდინარეობის თაობაზე Bloomberg-ის პლატფორმა ავრცელებს. ამავე მონაცემების თანახმად, დღეში საშუალოდ 33.8 მილიონი ადამიანი იცრება.

Bloomberg-ის მიხედვით მსოფლიოში გამოყენებული ვაქცინების რაოდენობა, საშუალოდ ყოველი 100 ადამიანიდან 96-ის ერთი დოზით აცრისთვისაა საკმარისი. ქვეყნებს შორის, ყველაზე მეტი ადამიანი ჩინეთშია ვაქცინირებული, სადაც გამოყენებული დოზების რაოდენობამ 2.36 მილიარდს გადააჭარბა. ინდოეთში გამოყენებული ვაქცინების დოზების რაოდენობა 1.1 მილიარდზე მეტია, ევროკავშირში ვაქცინების 606 მილიონზე მეტი დოზა გამოიყენეს, აშშ-ში კი 437 მილიონი.

Bloomberg-ის თანახმად, ვაქცინების 2 დოზით ევროკავშირში მოსახლეობის 67,8 % აიცრა, აშშ-ში 58,7 %, ჩინეთში კი - 76,6%-ზე მეტი.