ბაჩო დოლიძე - სრულიად ახლებურ ტაქტიკას და სტრატეგიას მივმართავთ ამ რეჟიმთან ბრძოლაში

„ქართული ოცნება“ მიშას არ გაათავისუფლებს, რაც არ უნდა ვიძახოთ ყველამ ერთად - ყოველდღიურად ვართ მოლაპარაკებების რეჟიმში, რადგან სრულიად ახლებურ ტაქტიკას და სტრატეგიას მივმართავთ ამ რეჟიმთან ბრძოლაში, - ამის შესახებ „ნაციონალური მოძრაობის“ წევრმა, ბაჩო დოლიძემ „პალიტრანიუსის“ გადაცემაში „რეზიუმე“ განაცხადა.

მისი თქმით, კონკრეტული გეგმა რამდენიმე დღეში გახდება ცნობილი.

„ბრძოლის სრულიად ახალ ეტაპი იწყება, რომელიც დარწმუნებული ვარ გამოიტანს შედეგებს, რადგან ამის გამოცდილება ერთიანი პლატფორმიდან გვაქვს. ჩატარდა აქციები და ეს არ იყო ერთი პარტიის აქცია, არამედ ზეპარტიული აქციები, სადაც ჩვენ ვითხოვდით ქვეყნის მესამე პრეზიდენტის გადარჩენას.

„ქართული ოცნება“ მიშას არ გაათავისუფლებს, ეს გამორიცხულია, რაც არ უნდა ვიძახოთ ყველამ ერთად. ბატონი სააკაშვილის პოზიციაც ეს არის, ჩვენ თუ არ დავდეთ რიგგარეშე არჩევნები, მას არ მიეცემა საშუალება, რომ თავის თავი დაიცვას იმ სივრცეში.

ისევ მშვიდობიანად, წინ არ გავუსწრებ მოვლენებს, ახლაც კი ყოველდღიურად ვართ მოლაპარაკებების რეჟიმში, რადგან სრულიად ახლებურ ტაქტიკას და სტრატეგიას მივმართავთ ამ რეჟიმთან ბრძოლაში. რამდენიმე დღეში უკვე ღიად გვექნება ამაზე ოფიციალური ბრიფინგი“, - განაცხადა ბაჩო დოლიძემ.