შალვა პაპუაშვილი - სახელმწიფოს პასუხისმგებლობაა, რომ მოსწავლესთან კომპეტენციის მქონე პროფესიონალი შევიდეს

სახელმწიფოს პასუხისმგებლობაა, რომ მოსწავლესთან კომპეტენციის მქონე, პროფესიონალი შევიდეს - სახელმწიფომ შანსი მისცა ყველას და ვფიქრობ, რომ ყველანაირი შესაძლებლობა ამ კუთხით, ლოიალურობის კუთხით, სახელმწიფომ პედაგოგებს აჩვენა, ამიტომ ეს ზღვარი აქ უნდა გაივლოს, - ამის შესახებ საქართველოს პარლამენტის განათლებისა და მეცნიერების კომიტეტის თავმჯდომარემ, შალვა პაპუაშვილმა კომიტეტის სხდომაზე განაცხადა.

მისი თქმით, იმ პედაგოგებს, რომლებიც კომპეტენციას მომავალში დაადასტურებენ, სისტემაში ხელახლა შემობრუნების შესაძლებლობა ექნებათ.

„ამ პროცედურის მიზანი იყო სწორედ ის, რომ დაედგინა და გაემიჯნა პედაგოგი, რომელიც ადასტურებს კვალიფიკაციას და პედაგოგი, რომელიც ვერ ადასტურებს ამ კომპეტენციას. საბოლოო ჯამში, შედეგი იქნებოდა, რომ იქნებოდნენ პედაგოგები, რომლებიც კომპეტენციის ზღვარს ვერ გადალახავდნენ. ეს რეფორმა დიდი ხანია მიმდინარეობს რამდენჯერმე მოხდა გადავადება. კომპეტენციებს სჭირდება დადასტურება, პედაგოგების დაახლოებით 90%-მა იშრომა, დრო გამოყო, ოჯახს მოაკლო და კიდევ ერთხელ დისციპლინა გამოავლინა, რომ მომზადებულიყვნენ ამ გამოცდებისთვის. სახელმწიფოს პასუხისმგებლობა არის, რომ მოსწავლესთან კომპეტენციის მქონე, პროფესიონალი შევიდეს. ეს არა თუ უფლებაა, არამედ ჩვენ, როგორც მშობლებმა სახელმწიფოს უნდა მოვთხოვოთ, რომ ჩვენს შვილებთან, ვინაიდან ეს არის რეგულირებადი პროფესია, იყვნენ პედაგოგები, რომლებსაც აქვთ სათანადო კომპეტენცია. სახელმწიფომ შანსი მისცა ყველას და ვფიქრობ, რომ ყველანაირი შესაძლებლობა ამ კუთხით, ლოიალურობის კუთხით სახელმწიფომ პედაგოგებს აჩვენა, ამიტომ ეს ზღვარი აქ უნდა გაივლოს.

რაც შეეხება სისტემაში ხელახლა შემობრუნებას - ვინც მომავალში დაადასტურებს ამ კომპეტენციებს, ხელახლა შემობრუნების შესაძლებლობა ექნება და ესეც მნიშვნელოვანი გადაწყვეტილებაა.

სტანდარტი არის ცალსახა, მარტივი, ადამიანური, გასაგები, რომ ბავშვებთან უნდა იყვნენ შესაბამისი კვალიფიკაციის და კომპეტენციის მქონე პედაგოგები და ვფიქრობ, რომ სახელმწიფომ დაადასტურა, რომ ლოიალური იყო პედაგოგების მიმართ იმ მაქსიმალურ ზღვრამდე, რაც იყო შესაძლებელი. გადავადება მოხდა რამდენჯერმე და გამოსავალი ვერ დადგა, წლების განმავლობაში ხდებოდა გადავადება აი, ბოლოჯერ, ბოლოჯერ, ბოლოჯერ და ეს ბოლოჯერ არ დადგა და ჩემი პირადი პოზიციაა, რომ თუკი ვიტყვით, რომ ეს იყოს ბოლოჯერ - ეს უნდა იყოს ბოლოჯერ“, - განაცხადა პაპუაშვილმა.