ხატია დეკანოიძე - თავგანწირვის აქტი მნიშვნელოვანია - ამ ეტაპზე მე არ ვარ იმ ადამიანებს, შორის, ვინც იშიმშილებს

ვფიქრობ, მნიშვნელოვანია თავგანწირვის აქტი - ამ ეტაპზე, სამწუხაროდ, მე არ ვარ იმ ადამიანებს, შორის, ვინც იშიმშილებს, - ამის შესახებ „ერთიანი ნაციონალური მოძრაობის“ ერთ-ერთმა ლიდერმა, ხატია დეკანოიძემ, რუსთაველის გამზირზე მიმდინარე აქციაზე ჟურნალისტებთან განაცხადა.

როგორც ხატია დეკანოიძე განმარტავს, „ნაციონალური მოძრაობის“ მიერ მასობრივი შიმშილობის აქციის დაწყება ულტიმატუმს არ ეფუძნება. ამასთან დასძენს, რომ ხელისუფლების პროპაგანდაა გავრცელებული ინფორმაცია, რომლის თანახმადაც, პარტიას დაფინანსება შეუწყდებოდა, თუ შიმშილობის აქციას არ დაიწყებდა.

„ულტიმატუმი ნამდვილად არ იყო. ეს გადაწყვეტილება ჩვენ მივიღეთ, მათ შორის, ოფისთან, რათა ხელი არ შევუშალოთ ბავშვებს, რომლებიც მოდიან ნაძვის ხესთან.

ეს იყო გადაწყვეტილება, რომელიც გუნდურად მივიღეთ. ასევე მივიღეთ გადაწყვეტილება, რომ ჩართულები ვიყოთ და ხელი არ შევუშალოთ იმ პროცესს, რომელიც პრეზიდენტის მიერ არის წამოწყებული. მე გახლდით შეხვედრაზე და მზად ვარ, ნებისმიერ დროს მივიდე პრეზიდენტთან პარტიების შეხვედრაზეც.

ვფიქრობ, მნიშვნელოვანია თავგანწირვის აქტი. ამ ეტაპზე, სამწუხაროდ, არ ვარ იმ ადამიანებს, შორის, ვინც იშიმშილებს. კონკრეტულად გვჭირდება ადამიანები, რომლებიც სხვადასხვა მიმართულებით იბრძოლებენ. მესმის და ძალიან ვაფასებ ნიკა მელიას გადაწყვეტილებას“,-აღნიშნავს დეკანოიძე.