პარლამენტი ევროკავშირის კვლევისა და ინოვაციის ჩარჩო პროგრამაში - „ჰორიზონტი ევროპა" საქართველოს მონაწილეობას მხარს უჭერს

პარლამენტმა, განიხილა და 85 ხმით, ერთხმად მიიღო დადგენილების პროექტი „ერთი მხრივ, საქართველოსა და მეორე მხრივ, ევროკავშირს შორის ევროკავშირის კვლევისა და ინოვაციის ჩარჩო პროგრამაში - „ჰორიზონტი ევროპა" საქართველოს მონაწილეობის შესახებ" საერთაშორისო შეთანხმების რატიფიცირების თაობაზე.

საქართველოს პარლამენტის პრესსამსახურის ინფორმაციით, შეთანხმება ითვალისწინებს საქართველოს ასოცირებულ წევრად მიერთებას ევროკავშირის პროგრამაში - „ჰორიზონტი ევროპა".

განათლებისა და მეცნიერების მინისტრის მოადგილე ნუნუ მიცკევიჩის განმარტებით, შეთანხმების შედეგად ჩვენს მეცნიერებს შესაძლებლობა მიეცემათ ჰქონდეთ წვდომა 95,5 მილიარდი ევროს ბიუჯეტის მქონე სივრცეზე, სადაც მათ იგივე პირობებით შეეძლებათ მონაწილეობა, როგორც ევროკავშირის ქვეყნების წარმომადგენლებს.

„ასევე, ევროკავშირში დაფუძნებულ იურიდიულ პირებს შეეძლებათ მონაწილეობა მიიღონ საქართველოს პროგრამებსა და პროექტებში, რომლებიც „ჰორიზონტი ევროპა" პროგრამის ეკვივალენტურია. დოკუმენტის საფუძველზე იქმნება ევროკავშირ-საქართველოს ერთობლივი კვლევისა და ინოვაციის კომიტეტი“,- აღნიშნულია გავრცელებულ ინფორმაციაში.