რესპუბლიკურ საავადმყოფოში დღიურად კორონავირუსის საწინააღმდეგო 2000-მდე აცრა ტარდება. როგორც ჟურნალისტებს რესპუბლიკური საავადმყოფოს დირექტორის მოადგილემ, ჯავარა უგრეხელიძემ განუცხადა, 60 წელს ზემოთ მოქალაქეების მიმართვა აცრაზე მცირდება, თუმცა, მოიმატა "ბუსტერ" დოზების მსურველთა რაოდენობამ.

„რესპუბლიკურ საავადმყოფოში ბოლო კვირაში გააქტიურდა ვაქცინაციის ტემპი, რაც ძალიან კარგია, თუმცა მაინც არ არის ეს ის ციფრები, რაც სასურველია, მეტი გვჭირდება. რესპუბლიკურ საავადმყოფოში დღიურად 2000-მდე აცრა ტარდება. 60 წელს ზემოთ მოქალაქეების მომართვა აცრაზე მცირდება. განსაკუთრებით გააქტიურებულია "ბუსტერ" დოზები, რაც კარგია. ბავშვების აცრის მხრივ განსაკუთრებული აქტივობა არ შეიმჩნევა",- აღნიშნა ჯავარა უგრეხელიძემ.