პარტია „გირჩის“ ერთ-ერთი ლიდერის, იაგო ხვიჩიას თქმით, არაფერი უჩვეულო არ არის იმაში, რომ ექსპრეზიდენტი მიხეილ სააკაშვილი გორის სამხედრო ჰოსპიტლიდან რუსთავის ციხეში გადაიყვანეს.

როგორც მან ჟურნალისტებს განუცხადა, „ნაციონალური მოძრაობის“ სტრატეგია მიხეილ სააკაშვილის გორის სამხედრო ჰოსპიტალში გადაყვანის თაობაზე მცდარი იყო.

იაგო ხვიჩია მიიჩნევს, რომ ის თავიდანვე საზღვარგარეთ უნდა გადაეყვანათ.

„თუ ადამიანი არის პატიმარი, მგონი არავის გაუკვირდება, რომ ის ციხეში გადაჰყავდეთ. ამიტომ, მე თავიდანვე ვამბობდი, რომ „ნაციონალური მოძრაობის“ სტრატეგია მიხეილ სააკაშვილის გორის კლინიკაში გადაყვანის შესახებ მცდარი იყო, მათ თავიდანვე, მეორე დღიდანვე უნდა მოეთხოვათ ის, რასაც ჩვენ ვითხოვდით. კერძოდ, მიხეილ სააკაშვილის საზღვარგარეთ გადაყვანა, რომელიც მათ მხოლოდ ახლა დაიწყეს და ამდენი დრო დაიკარგა. მთელი კამპანია რომ ჩატარებულიყო მიხეილ სააკაშვილის საზღვარგარეთ გადაყვანასთან დაკავშირებით, როგორც ამას ჩვენ ვამბობდით, მგონი ახლა სხვა სიტუაცია იქნებოდა“, - აცხადებს ხვიჩია.