გიორგი ბოტკოველი - რუსთავის საკრებულოში ხელისუფლება წარმოადგენს ოპოზიციას და ეს არის ლოგიკური დასასრული

შეიძლება ვთქვათ, რომ რუსთავის საკრებულოში ხელისუფლება წარმოადგენს ოპოზიციას და ვფიქრობ, რომ ეს არის ლოგიკური დასასრული, - ამის შესახებ „ნაციონალური მოძრაობის“ ერთ-ერთმა ლიდერმა, გიორგი ბოტკოველმა „პალიტრანიუსის“ გადაცემაში „360 გრადუსი“ განაცხადა.

მისი თქმით, აღნიშნული გადაწყვეტილებით, მუნიციპალიტეტს მიეცემა საშუალება, რომ დადგეს ის რეალობა, რომელ რეალობასაც იმსახურებს.

„ამ ყველაფერს ჩვენ შეიძლება ვუწოდოთ ლოგიკური გადაწყვეტილება, რომელიც რუსთავის საკრებულოში არსებულმა ოპოზიციურმა პარტიებმა მიიღეს. თუმცა დღეის მდგომარეობით შეიძლება ვთქვათ, რომ რუსთავის საკრებულოში ხელისუფლება წარმოადგენს ოპოზიციას და ვფიქრობ, რომ ეს არის ლოგიკური დასასრული. არამარტო რუსთავში, იგივე წალენჯიხაში, იგივე ჩხოროწყუში, იგივე ზუგდიდში, რომელშიც დარწმუნებული ვარ, გავალთ იმ შედეგზე, რომ პასუხისმგებლობა აიღოს ოპოზიციამ ხალხის არჩევანის შესაბამისად. დღეს ამ გადაწყვეტილებით უფრო მეტად მიეცემა მუნიციპალიტეტს საშუალება, რომ აღსრულდეს ის რეალობა, რომელ რეალობასაც იმსახურებენ იქ მცხოვრები ადამიანები“, - განაცხადა გიორგი ბოტკოველმა.

გიორგი ბოტკოველის განცხადებით, რუსთავის საკრებულოში მომხდარს არ შეიძლება, ვუწოდოთ „ნაციონალური მოძრაობისა“ და პარტია „საქართველოსთვის“ ალიანსი, არამედ ეს იყო ოპოზიციის ერთობლივი გადაწყვეტილება.

„როგორ შეიძლება, ალიანსი დავარქვათ? ეს არის ოპოზიციის ერთობლივი გადაწყვეტილება და ამ გადაწყვეტილების შესაბამისად შედგა ის, რაც შედგა და მოხდა ის, რაც მოხდა. ასევე, იგივე სიტუაციაა სენაკში. ანალოგიური სხდომა უნდა ჩატარებულიყო, თუმცა ჩვენ ვნახეთ, რომ ხელისუფლებამ ყველაფერი გააკეთა იმისთვის, რომ ხელი შეეშალა სხდომის ჩატარებისთვის და სენაკში ვერ დასრულდა ისე, როგორც უნდა დასრულებულიყო, თუმცა დარწმუნებული ვარ, რომ ესეც ძალიან მალე მოხდება“, - განაცხადა გიორგი ბოტკოველმა.

შეგახსენებთ, რუსთავის საკრებულოს თავმჯდომარედ გიორგი გახარიას პარტიის "საქართველოსთვის" წევრი ნოდარ შეროზია აირჩიეს.