მიხეილ სააკაშვილის მხარდამჭერებმა რუსთავის ციხესთან აქცია გამართეს
რუსთავის მე-12 პენიტენციურ დაწესებულებასთან საქართველოს მესამე პრეზიდენტის, მიხეილ სააკაშვილის მხარდამჭერები საპროტესტო აქციას მართავენ.
შეკრებილები მისი პატიმრობიდან გათავისუფლებას მოითხოვენ და აცხადებენ, რომ მიხეილ სააკაშვილის ეკონომიკური გეგმის შესასრულებლად აუცილებელია, მან ციხე დატოვოს.
აქციის მონაწილეებს ადგილზე მიტანილი აქვთ საქართველოსა და უკრაინის დროშები, ასევე პლაკატები, წარწერით: „თავისუფლება მიშას“.
„დიდი ხანია "ქართული ოცნება“ ამ ქვეყანაში არაფერს აღარ ასრულებს და არც ამ გეგმას გაჰყვება. ჩვენი მთავარი მოთხოვნაა, რაც შეიძლება სწრაფად გათავისუფლდეს მიხეილ სააკაშვილი და ეს ქვეყანა ნორმალურ განვითარებას დაუბრუნდეს“,-განაცხადა აქციის ერთ-ერთმა მონაწილემ.
„მიხეილ სააკაშვილის თავისუფლება, პირველ რიგში, ნიშნავს მეტ ინვესტიციას, მეტ სამუშაო ადგილებს, ეკონომიკურ წინსვლას და ყველა მიმართულებით სწრაფ, ეფექტურ ზრდას", - განაცხადა აქციის კიდევ ერთმა მონაწილემ.
