ეს არის საერთაშორისო სამართლის აშკარა და უხეში დარღვევა და არის მაგალითი იმისა, რა საფრთხეს უქმნის ყველას, უსაფრთხოების წესებისა და ნორმების დარღვევა, - ამის შესახებ საქართველოში ევროკავშირის ელჩმა კარლ ჰარცელმა რუსეთის პრეზიდენტის ვლადიმერ პუტინის მიერ დონბასის სეპარატისტული ე.წ. დონეცკისა და ლუგანსკის რესპუბლიკების აღიარების შესახებ განაცხადა.
მისი თქმით, ევროპელი ლიდერები პარტნიორებთან კონსულტაციებს გადიან იმასთან დაკავშირებით, თუ რა უნდა იყოს შემდგომი ნაბიჯები.
„ევროპელი ლიდერები უკვე გამოვიდნენ და დაგმეს შესაძლო ყველაზე ძლიერი გზით პრეზიდენტ პუტინის მიერ მიღებული გადაწყვეტილება დონეცკისა და ლუგანსკისა აღიარების შესახებ. ეს არის საერთაშორისო სამართლის აშკარა და უხეში დარღვევა. ეს არის მაგალითი იმისა, რა საფრთხეს უქმნის ყველას, უსაფრთხოების წესებისა და ნორმების დარღვევა.
ევროპელი ლიდერები კონსულტაციას გადიან პარტნიორებთან იმასთან დაკავშირებით თუ რა უნდა იყოს შემდგომი შესაბამისი ნაბიჯი. ჩვენ, ასევე, ველით კონსულტაციების გაგრძელებას საქართველოს ხელისუფლებასთან იმასთან დაკავშირებით, თუ რას ნიშნავს ეს რეგიონისთვის, მათ შორის, საქართველოსთვის და რა შესაბამისი დასკვნების გამოტანა შეიძლება არსებული ვითარებიდან,“- განაცხადა ჰარცელმა.
