“სტრატეგია აღმაშენებლის” და “რესპუბლიკური პარტიის” ლიდერები „რეფორმების ჯგუფის“ სახელით საქართველოში დიდი ბრიტანეთის ელჩს, მარკ კლეიტონს შეხვდნენ. ინფორმაციას ამის შესახებ „სტრატეგია აღმაშენებელი“ ავრცელებს.

პრესსამსახურის ცნობით, შეხვედრაზე საუბარი შეეხო უკრაინის წინააღმდეგ მიმართულ რუსულ აგრესიას და უსაფრთხოების გამოწვევებს, რომლის წინაშეც რეგიონთან ერთად დღეს საქართველოც დგას.

“სტრატეგია აღმაშენებლის” ინფორმაციითვე, შეხვედრაზე ხაზი გაესვა გაზრდილი საფრთხეების ფონზე ერთობის უდიდეს მნიშვნელობას, რომელიც ოპოზიციონერების აზრით ხელისუფლების ნების გამო არ შედგა.

„დიდი ბრიტანეთის ელჩთან, მარკ კლეიტონთან შეხვედრაზე უკრაინაში მიმდინარე მოვლენებზე და რეგიონში არსებულ უსაფრთხოების გამოწვევებზე ვისაუბრეთ. ასევე, ყურადღება რუსეთის მხრიდან მოსალოდნელ საფრთხეებზე გავამახვილეთ, რომლის წინაშეც ჩვენი ქვეყანა იმყოფება, კონკრეტულად ოკუპირებულ ტერიტორიებზე არსებულ ვითარებაზე და მცოცავ ანექსიაზე.

შეხვედრაზე კიდევ ერთხელ აღინიშნა, თუ გაზრდილი საფრთხეების ფონზე ერთობა როგორი მნიშვნელოვანია, რომელიც ჩვენი ინიციატივით, მრავალი მცდელობის მიუხედავად, ხელისუფლების ნების გამო არ შედგა. დიდი ბრიტანეთი საქართველოს დიდი მოკავშირე და პარტნიორი ქვეყანაა, რომელიც საქართველოს სუვერენიტეტსა და ნატოს წევრობას მხარს უჭერს. ამ მხარდაჭერისთვის მინდა ელჩს მარკ კლეიტონს მადლობა ვუთხრა“, - განაცხადა გიორგი ვაშაძემ.