უკრაინის პრეზიდენტმა ვოლოდიმირ ზელენსკიმ გერმანიის კანცლერს ოლაფ შოლცს, „ძლიერი ნაბიჯის“ გადადგმისკენ მოუწოდა და სთხოვა კიევს ორშაბათს, 9 მაისს ეწვიოს. ინფორმაციას Sky News ავრცელებს.

„ის მოწვეულია, მოწვევა ღიაა, ეს უკვე დიდი ხანია ასეა. მას შეუძლია გადადგას ეს ძალიან ძლიერი პოლიტიკური ნაბიჯი, რომ ჩამოვიდეს აქ, კიევში 9 მაისს. მე არ ვხსნი მნიშვნელობას, ვფიქრობ, თქვენ საკმარისად კულტურული ხართ, რომ გაიგოთ რატომ“, - განაცხადა ზელენსკიმ.

გარდა ამისა, უკრაინის პირველმა პირმა დაგმო რუსეთი, განსაკუთრებით მარიუპოლში განხორციელებული ქმედებების გამო, სადაც ოფიციალური კიევის განცხადებით, ალყაში მოქცეულ „აზოვსტალის“ ფოლადის ქარხანაში მშვიდობიანი მოქალაქეები ჯერ კიდევ იმალებიან.