ეს ომი უნდა დასრულდეს და მშვიდობა უნდა დამყარდეს, - ამის შესახებ გაერო-ს გენერალური მდივნის, ანტონიო გუტერეშის განცხადებაშია აღნიშნული, რითაც ის რუსული ძალების მიერ ლუგანსკის ოლქში, ბელოგოროვკას სკოლის შენობის დაბომბვას ეხმიანება.

„ეს თავდასხმა კიდევ ერთი შეხსენებაა, რომ ამ ომში, ისევე როგორც ბევრ სხვა კონფლიქტში, ყველაზე მაღალ ფასს სწორედ მშვიდობიანი მოსახლეობა იხდის. ომის დროს მშვიდობიანი მოსახლეობა და სამოქალაქო ინფრასტრუქტურა ყოველთვის უნდა იყოს დაცული. ეს ომი უნდა დასრულდეს და მშვიდობა უნდა დამყარდეს გაეროს წესდების და საერთაშორისო სამართლის შესაბამისად,“- ნათქვამია განცხადებაში.

7 მაისს, უკრაინის სოფელ ბელოგოროვკაში რუსმა სამხედროებმა სკოლა დაბომბეს, რომლის სარდაფს 90-მდე მშვიდობიანი მოქალაქე აფარებდა თავს. უკრაინის ხელისუფლებაში აცხადებენ, რომ დაღუპულია 60-მდე ადამიანი.

იხილეთ ვიდეო:ანტონიო გუტერეში ლუგანსკში სკოლის დაბომბვაზე - ეს თავდასხმა კიდევ ერთი შეხსენებაა, რომ ამ ომში ყველაზე მაღალ ფასს სწორედ მშვიდობიანი მოსახლეობა იხდის