რუსი ოკუპანტების უდიდესი აქტიურობა შეიმჩნევა სლობოჟანსკის და დონეცკის მიმართულებებით, ამავდროულად, დიდია უკრაინის მთელ ტერიტორიაზე სარაკეტო დარტყმის განხორციელების ალბათობა, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

„დონეცკის მიმართულებით მოწინააღმდეგემ ავიაციისა და არტილერიის მხარდაჭერით ძირითადი ძალისხმევა მიმართა რუბეჟნოეს და პოპასნაიას დასახლებებზე კონტროლის მოპოვების მცდელობაზე და სევერსკის, სლავიანსკის, ლისიჩანსკისა და ავდეევკას მიმართულებებით შეტევითი ოპერაციების გასაგრძელებლად მომზადებაზე, გაზარდა თავისი საცეცხლე საშუალება და ცდილობს გაარღვიოს ჩვენი ჯარების თავდაცვა,“ - აღნიშნულია ინფორმაციაში.

გენშტაბის ცნობით, დროებით ოკუპირებული ყირიმის ავტონომიური რესპუბლიკის ტერიტორიაზე რუსული ძალები აქტიურად ემზადებოდნენ საზეიმო აღლუმებისთვის.

„ზაპორიჟიეს ოლქის დროებით ოკუპირებულ ტერიტორიაზე დაფიქსირდა შემთხვევები, როცა ადგილობრივ მოსახლეობას უმიზეზოდ ართმევდნენ საბუთებს, რომლებსაც იმ შემთხვევაში დაუბრუნებენ, თუ მონაწილეობას მიიღებენ „გამარჯვების დღესთან“ დაკავშირებით საზეიმო ღონისძიებებში. დროებით ოკუპირებული ყირიმის ავტონომიური რესპუბლიკის ტერიტორიაზე რუსეთის მტერი აქტიურად ემზადებოდა საზეიმო აღლუმებისთვის,“ - აღნიშნულია ინფორმაციაში.

გენშტაბის ცნობით, გასული დღის განმავლობაში, საჰაერო ძალების და სახმელეთო ძალების საჰაერო თავდაცვის დანაყოფებმა რუსი ოკუპანტების ათი საჰაერო სამიზნე გაანადგურეს, მათ შორის 6 უპილოტო საფრენი აპარატი Orlan-10, ერთი Forpost-ის ტიპის დრონი და სამი ფრთოსანი რაკეტა.

„დონეცკისა და ლუგანსკის ოლქებში უკრაინის დამცველებმა წარმატებით მოიგერიეს მტრის ექვსი შეტევა, გაანადგურეს 20 ტანკი, ერთი საარტილერიო სისტემა, 28 ერთეული ჯავშანტექნიკა, ერთი სპეციალური ჯავშანმანქანა და 5 ერთეული საავტომობილო ტექნიკა,“ - აღნიშნულია ინფორმაციაში.