რუსეთის მიერ უკრაინაში შეჭრის საპასუხოდ, იტალიის პრემიერ-მინისტრმა მარიო დრაგიმ და შეერთებული შტატების პრეზიდენტმა ჯო ბაიდენმა დღეს თეთრი სახლის ოვალურ კაბინეტში გამართულ შეხვედრაზე ტრანსატლანტიკურ ერთიანობას ხაზი გაუსვეს.

ამის შესახებ ინფორმაციას Agence France-Presse ავრცელებს.

„ჩვენს ორ ქვეყანას შორის კავშირები ყოველთვის ძლიერი იქნება და უკრაინის ომმა ისინი უფრო ძლიერი გახადა. ვლადიმერ პუტინი ფიქრობდა, რომ მას შეეძლო ჩვენი გაყოფა. მან ეს ვერ შეძლო, ჩვენ ერთად ვდგავართ“, - განუცხადა დრაგიმ ბაიდენს.

„პუტინს სჯეროდა, რომ მას შეეძლო ჩვენი გაყოფა, მაგრამ ჩვენ ყველანი გავძლიერდით“, - დასძინა თეთრი სახლის ლიდერმა.

დრაგიმ ასევე პირობა დადო, რომ რისკების მიუხედავად მხარს დაუჭერს ევროკავშირის ნებისმიერ სანქციებს რუსეთის ენერგეტიკულ სექტორზე.

მედიის ცნობით, რუსულ გაზზე იტალიის დამოკიდებულებისა და ოფიციალური რომის მოსკოვთან ტრადიციულად მეგობრული კავშირების მიუხედავად, უკრაინაზე თავდასხმის გამო, დრაგის მთავრობა რუსეთის დასჯის მცდელობების მტკიცე მხარდამჭერია.

როგორც მედია წერს, დასავლელ მოკავშირეებთან ერთად, რომმა კიევს იარაღი გაუგზავნა, თუმცა დრაგის ეროვნული თანხმობის მთავრობაში ამ ნაბიჯის მიმართ მზარდი უკმაყოფილებაა.

აღსანიშნავია, რომ იტალიის ბუნებრივი გაზის იმპორტის 40 პროცენტი ამჟამად რუსეთიდან მოდის.

შეგახსენებთ, ევროკავშირი ამჟამად რუსული ნავთობის იმპორტის ეტაპობრივ აკრძალვას განიხილავს.