აშშ-ის თავდაცვის მინისტრმა, ლოიდ ოსტინმა უკრაინელ კოლეგასთან, ოლექსი რეზნიკოვთან სატელეფონო საუბრის დროს კიდევ ერთხელ დაადასტურა აშშ-ის ურყევი მხარდაჭერა უკრაინის სუვერენიტეტისა და უსაფრთხოების უზრუნველყოფის მცდელობებისადმი და მიაწოდა ინფორმაცია რუსეთის თავდაცვის მინისტრთან გამართული სატელეფონო საუბრის შესახებ, - ინფორმაციას აშშ-ის თავდაცვის დეპარტამენტი ავრცელებს.
„ოსტინი გაესაუბრა რეზნიკოვს ბრძოლის ველზე არსებული სიტუაციისა და უკრაინის საჭიროებების განსახილველად“, - ნათქვამია დეპარტამენტის განცხადებაში.
მათივე ინფორმაციით, ლოიდ ოსტინმა რეზნიკოვს მიაწოდა ინფორმაცია იმის შესახებ, რომ რუსეთის თავდაცვის მინისტრს, სერგეი შოიგუს მოუწოდა, „დაუყონებლივ შეწყდეს კონფლიქტი უკრაინაში.“
„მდივანმა ოსტინმა კიდევ ერთხელ დაადასტურა აშშ-ის ურყევი მხარდაჭერა უკრაინის სუვერენიტეტისა და უსაფრთხოების მცდელობების მიმართ, რომელიც მიმართულია რუსეთის აგრესიის წინააღმდეგ უკრაინის შესაძლებლობის გასაძლიერებლად,“- აცხადებენ აშშ-ის თავდაცვის დეპარტამენტში.