უკრაინის პრეზიდენტის, ვოლოდიმირ ზელენსკის განცხადებით, რუსული ძალების სარაკეტო თავდასხმები უკრაინის ტერიტორიებზე არის მცდელობა, ქვეყნის აღმოსავლეთსა და სამხრეთში განცდილი წარუმატებლობის კომპენსირება მოახდინონ.
„ლვოვის ოლქის, სუმის ოლქის, ჩერნიგოვის ოლქის სარაკეტო დაბომბვა. საჰაერო დარტყმები ლუგანსკის ოლქში, დივერსიული აქტივობა უკრაინის სასაზღვრო რაიონებში. ეს ყველაფერი არ არის მხოლოდ ჩვენი სახელმწიფოსთვის დაძაბულობის შექმნა და ჩვენი ძალების გამოცდა. ეს არის რუსეთის არმიის ერთგვარი მცდელობა, ჩვენი ქვეყნის აღმოსავლეთსა და სამხრეთში განცდილი წარუმატებლობის სერიის კომპენსირება მოახდინოს,“- აღნიშნა ზელენსკიმ.
მისი თქმით, ეს დარტყმები რადიკალურად არაფერს ცვლის.
„მათ არ შეუძლიათ წარმატების დემონსტრირება ზოგადი სამხედრო მოქმედებებით იმ ადგილებში, სადაც წინსვლას ცდილობენ. ამიტომ ისინი ცდილობენ აჩვენონ წარმატება თავიანთი რაკეტებით და სხვა საქმიანობით. ასევე უშედეგოდ. ეს დარტყმები, ისევე როგორც მრავალი წინა, არაფერს ცვლის რადიკალურად. მით უმეტეს, რომ ჩვენი საჰაერო თავდაცვა და დივერსიის საწინააღმდეგო ღონისძიებები ძლიერდება,“- აღნიშნა უკრაინის პრეზიდენტმა.